СУДААРЫСТЫБАННАС  КҮНҮГЭР САНАА

Ойуунускай диэн кимий? Хоочугур Өлөксөй уола Былатыан Ойуунускай духуобунай уонна национальнай лидер, этиттэриилээх айааччы, үйэлээх бэлиэ быһыытынан Саха сирин уонна саха омук историятыгар Киристиэс Арҕааҥҥы эйгэҕэ ылар суолтата суолталаах кэрэмэс киһи, саарын саха. Кэм-кэрдии ааһан истэҕин ахсын ол өссө дьэҥкэтик көстөн иһэр уонна иһиэҕэ даҕаны – туох баарбыт барыта ОЙУУНУСКАЙ ИННИНЭ уонна  ОЙУУНУСКАЙ КЭННИТТЭН диэн кэрдиискэ арахсар, ол кээмэйинэн кээмэйдэнэр.

Ааспыт үйэҕэ өр кэмнээх биһиги норуоппут кырдьыгын, чиэһин, суобаһын иһин уота суох сэрии Ойуунускай аатын тула барбыта итиэннэ, быһыыта, бара да турар… Саха бастаахтарын – салалтатын, үөрэхтээхтэрин ортотугар урут-уруккуттан икки бөлөх баара – Ойуунускайы өйөөччү уонна кинини утарааччы. Ойуунускайы өйөөччү ол аата, норуот диэки, утарааччы – ол норуотун утары барбыт таҥнарыахсыт диэн чопчу өйдөнөрө. Ортото диэн суоҕа. Үгүс саха чулуулара Ойуунускай туһугар – норуот туһугар ууга-уокка түһэллэрэ…

Билигин Ойуунускай холугар, таһымыгар тэҥнээтэххэ бэрт кыра боппуруос тирээн турар: кини мэҥэ өйдөбүнньүгэ уонна кини аатын сүгэр саха академическай тыйаатыра турар болуоссаттарыгар КИНИ сырдык аатын иҥэрии. Салалта, туһааннаах тойоттор-хотуттар тоҕо кээрэҥнииллэрин, сээбэҥнииллэрин, саарбахтыылларын, саараҥныылларын мин тус бэйэм олох өйдөөбөппүн… Ойуунускай төрөөбүт дойдутун, норуотун, бэйэтэ тэрийбит өрөспүүбүлүкэтин киин куоратын биир сүрүн болуоссатыгар, Ойуунускай саҥа, чыҥха атын кэрдиискэ таһаарбыт тапталлаах Сахатын сирин уонна сахатын омугун биир бэлиэ сиригэр ОЙУУНУСКАЙ аатын иҥэрэр, чыккымай тугуттан эрэ иҥнибитигэр диэри, тоҕо кыайтара, быһаарылла охсубатый, тоҕо ол туһугар норуот умналаан эрэрдии илии баттыахтааҕый?! Бу – саат уонна суут эбээт!!!

Субу соторутааҕыта аҕай өрөспүүбүлүкэни, уопсастыбаны, киин куораты бүттүүнүн сомоҕолоон, түмэн талыллыбыт салалта уонна дьокутааттар, биһиги, быыбардааччылар, ол эбэтэр норуот итэҕэлбитин сүкпүт дьон Ойуунускай курдук улахан аакка сыһыаннаах кыра кыһалҕаны биир санаанан, үгүс аймалҕана суох быһаарыахтара диэн бигэ эрэллээхпин.

…Күн бүгүн сэбиэскэй кэмнээҕи Ойуунускайы өйөөччү уонна кинини утарааччы диэн өйдөбүллэр саха бастаахтарын, салалтатын, үөрэхтээхтэрин ортотугар, хомойуох иһин, өссө да уоста иликтэр бадахтаах. Бу биир боппуруос норуот диэки уонна норуоту утары диэн судургута суох өйдөбүлү быһаарарга ыйааһын бэскитэ, тирэнэр тулааһын буолар. Оттон Норуот – хараҕа кыраҕы, кулгааҕа чуор – барытын билэ-көрө, истэ-билэ сылдьар…

Хор, мин Саха Өрөспүүбүлүкэтин Судаарыстыбаннаһын күнүнээҕи ырыта тыыттарар ис санаам оннук чычаас, кылгас уонна быстах. Онно холоотоххо саха саарына Ойуунускай туппут өрөспүүбүлүкэтин курдук баай уонна баараҕай, айбыт олоҥхотун курдук муҥурун хаһан да булларбат…

Гаврил АНДРОСОВ

Балаҕан ыйын 27 күнэ

Чолбон. – № 10. – 2018

Тарҕат:

Подписаться

Салгыы аах

Сүбэлиибит