ООННЬУУР ДЬОНО:
Руфина – үөрэҕин саҥа бүтэрэн үлэһит буолбут кыыс, кэлин блогер буолар.
Тоня – кини дьүөгэтэ.
Аана – 70-тан тахсыбыт дэриэбинэҕэ олорор Руфина эбэтэ.
Аполлон – спортклуб хаһаайына, эдэр уол, кэлин бизнесмен буолар.
Айдаар – киирбит-тахсыбыт, саҥалаах-иҥэлээх уол, Аполлон доҕоро.
Байбал – спортивнай көрүҥнээх, Аполлон доҕоро.
Виктор – уу таһааччы, кэлин таксист.
Катя – саҥалаах-иҥэлээх, сытыы-хотуу дьахтар.
Полиция үлэһиттэрэ.
Суһал көмө бырааһа.
Сиэстэрэ.
Руфина дьүөгэлэрэ.
Пицца, суши, сибэкки, туорт тиэрдэн биэрээччи.
Сууйар-сотор хампаанньа үлэһитэ.
Бастакы көстүү
Куорат. Күһүҥҥү ардахтаах сарсыарда. Руфина үлэтигэр баран иһэн төлөпүөнүнэн быһа ситимҥэ кэпсии иһэр.
Руфина. Бука барыгытын үтүө сарсыарданан! Күн-дьыл туруга ардахтаах, бадарааннаах да буоллар, мин курдук ханнык да түгэҥҥэ санааҕытын түһэримэҥ. Киһи туруга үчүгэй буоллаҕына, ханнык да күн-дьыл туруга мэһэйдиэ суохтаах. Үлэбэр кэллим. Барыгытыгар ситиһиини баҕарабын! (Тулатын төлөпүөнүгэр уста-уста хааман истэҕинэ, утары уу бытыылкатын сүкпүт уол, төлөпүөнүн көрө-көрө, сүүрэн иһэн күүскэ баҕайы кэтиллэн, кыыһы түҥнэри көтөн кэбиһэр. Кыыс төлөпүөнүн туппутунан бадарааҥҥа охтон түһэр.)
Уол. Алҕас, бырастыы гыныҥ!
Руфина. Сүөһү! Көрүөххүнүй ханна баран иһэргин! (Виктор туруораары илиитин уунар.) Төлөпүөнүм! (Часкыйар.) Ууга түстэ буолбат дуо?! Төлөө, дьиккэр! Эбэтэр мин сууттаһабын!
Виктор. Оттон ити… Мин ыксаан испитим.
Руфина ытыыр, төлөпүөнүн ылар. Дьон мустар, камераҕа устан бараллар.
Виктор. Хаһыытыы сытыаҥ дуо, туруоруум.
Руфина. Уһулумаҥ! Мин эһигини суукка биэриэм! Ыттар! (Уол кыыһы көтөҕөн ылар.) Ыыт диибин! Ханна илдьэҕиний? Төлөпүөммүн ылыым, саатар. (Төлөпүөнүн ылар.) Сторизка уста сытар эбит буолбат дуо?! Сибиинньэ! Эн аан дойдуга саамай куһаҕан киһигин! (Араараары төлөпүөнүн баттыы сатыыр, онто харан хаалбыт.) Мин эйиэхэ бу сиргэ баар куһаҕаны барытын баҕарабын!
Виктор. Кэбис-кэбис. Туох куһаҕан тыллаах кыыскыный? Аадырыскын эт, ханна илдьэбин?
Руфина. Барыта эйигиттэн мин маннык буоллум, о-ол турар саһархай дьиэҕэ!
Виктор. Олор чэ, илдьиэм билигин.
Иккис көстүү
Студия-квартира. Тоня, араастаан тутта-тутта, дьыбааҥҥа бэйэтин бэйэтэ төлөпүөҥҥэ уста олорор. Онтон төлөпүөнүгэр тугу эрэ суруйар, соһуйбуттуу туттар. Руфина киирэн кэлэр.
Тоня. Хайа, Руфина, аата ынырыгын!
Руфина. Биир козел түҥнэри көтөн кэбиһэн, бу айылаах оҥордо. (Ытыыр.)
Тоня. Быһа ситимҥэ барытын көрдүм. Чэ, уоскуй, ытаама, ол оннугар көрүүй хас киһи көрбүтүн.
Руфина. Саатар, төлөпүөнүм алдьаныан иннинэ барытын устан кэбиспит.
Тоня. Ол диэн, көрүүй бу ханна эйигин таһаарбыттарын.
Руфина. Көрүөхпүн баҕарбаппын. (Киэр хайыһар.)
Тоня. Устубуккун төһө көрбүттэрин, хас киһи лайктаабытын көр.
Руфина. Ол бадарааҥҥа сытарбын лайктыыллар. Оттон мин кинилэргэ үчүгэйи кэпсиибин, туһалаах сүбэлэри биэрэ сатыыбын, кэрэни хаартыскаҕа түһэрэбин, ас астыыбын – төһө элбэх лайк туруораллар этэй? Сотторобун аккауммун! Уонна бүттэ! Мин суохпун инстаграмҥа…
Тоня. Хайдах гыныаххыный, билигин олох оннук – бары куһаҕаны эрэ күүтэллэр. Эн онно кыһаммакка эрэ, сурутааччыларыҥ биир чаас иһигэр төһө эбиллибиттэрин көр. Сууттаһа оонньоотоххуна – ыырыҥ ыраатар буоллаҕа дии.
Руфина. Аны бачча ыксалга төлөпүөнүм алдьанна. Өссө били киһи акаары баҕайы төлөпүөнүнэн төлөөрү гынна эҥин. Ону хайаан ылыахпыный?
Тоня. Чэ, онно марайся гыныма, билигин хата блогер буолуоххун сөп эбит, наконец-то. Бачча подписканы туһанан хаалар буоллаҕыҥ дии.
Руфина. Хайдах?
Тоня. Эйигин ол интернет нөҥүө ким даҕаны охсуо да, тэбиэ да суоҕа. Туохтан куттаннаххыный?
Руфина. Кыбыстабын.
Тоня. Билигин ким даҕаны туохтан да кыбыстыбат үйэтэ. Уонна эн соруйан сыппыт үһүгүн дуо, ити чалбахха? Дьэ оттон ити уолу төһө баҕарар осуждайдаатыннар.
Руфина суунар хоско киирэр. Тоня дьүөгэтин батыһа көрөр уонна күлэр. Руфинаны устубут видеоларын хос-хос төлөпүөнүгэр көрөр. Сирэйэ-хараҕа сэргэхсийэр.
Тоня. Акаары, кэһэйдиҥ дуо?! Чалбахха тарайан баран сыттыбыт эрэ, чооску курдук хаһыытыы-хаһыытыы. Киһи да күлэр. Блогер буола сатаахтыыр ээ, барахсан, киһи да аһынар. «Ханнык да күн-дьыл туруга мэһэйдиэ суохтаах» буолбаккаҕын. (Күлэрин туттуммат.) Кини фонугар мин олох красотка буоллаҕым дии. Хата спортклубка илдьэ барыахха баара акаарышканы, сирэйин кыратык уруһуйдуу түһэн баран.
Руфина баттаҕар соттор эринэн, халаат кэтэн суунар хостон тиэтэлинэн сүүрэн тахсан иһэн халтарыйар, төлөпүөнүн ыла охсор. Үөрбүт-көппүт сирэйэ улам хампарыйан барар.
Ватсап суруга. Руффи, бырасты гын ди кынан бран биһи кыйан биргэ болбапыт эбит. Арахсыах крче. Луше билигн,чем кэники.
Тоня. Туох буоллуҥ?
Руфина. Гоша суруйбут, көр.
Тоня (ааҕар.) Фууу, аата сүрүн! «Крче» буолан. Грамотей эбит, почерк выдал хозяина, ити суруйарын курдук кылгас уонна татым санаалаах киһи эбит. Хайдах итинник киһини кытары сылдьыбыккыный, пахай даҕаны! Пыы, ордьойон авата аата ынырыгын. (Руфина сыҥсыйан ытаан барар.) Уо-ай, ити бэйэлээхпитин аны аһыйдыбыт дуу! Хайдах буолаҕыный? Атын уол суоҕар дылы.
Руфина. Наар итинник! Эмиэ сатаммата! Ити барыта уу таһааччы дьээдьэттэн! Кини бадарааҥҥа охторботоҕо буоллар, маннык буолуо суох этэ. Гоша барытын көрдөҕө дии…
Тоня. Бүт эрэ! Уоскуй, туох ааттаах!
Руфина. Ыый-ыый, кимниин да, туох да табыллыбат. Кырдьарым буолуо маннык.
Тоня. Итинник пройдохалары аһыйан ытыы сытыаҥ дуо? Хата, миигин кытары залга барыс, онно бааллар үчүгэй уолаттар. Иҥиир да иҥиир, быччыҥ да быччыҥ!
Руфина. Ээ суох. Мин туох эрэ порчалаахпын быһыылаах. Ону ыраастата гадалкаҕа барыахпын наада. Син биир хатылана турар, мин өрүү соҕотохпун.
Тоня (үөһэ тыынар.) Ханнык да гадалката суох, мин ыраастыам эн акаары баҕайы оҥостубат диэн порчаҕын. Көрөөр эрэ хайдах эффектээх буоларын!
Руфина. Ээ чэ…
Тоня. Эр дьон харахтарынан таптыыллар, акаарычаан. Онон, дорогая, бүгүҥҥүттэн мин эйигин сүүс аҕыс уон кыраадыс уларытыынан дьарыктанабын. Өйдөөтүҥ? Бачча эдэр, бачча кыраһыабай, бачча үчүгэй кыыс буолан баран, ханнык эрэ придуроктан сылтаан ытыы олороору гынаҕын дуо?
Руфина. Син биир туох да сатаныа суоҕа!
Тоня. Бүт эрэ, хаалынньаҥ баҕайы толкуйданан! Боруобалаан көр, макияж феялара эйигин начаас конфетка оҥоруохтара!
Руфина. Мин кыараҕас хараҕым, умса көрө сылдьар кыламаным, прыщиктаах сирэйим, убаҕас баттаҕым, уруһуйдаан да туһата суох хааһым, кып-кылгас тыҥыраҕым, хаптаһын курдук фигурам ханнык да маастар феяҕа син биир бэриниэ суоҕа!
Тоня (күлэр.) Сүүрбэ биирис үйэ, Руфина! Оннооҕор буолуохтар оҥостон, кимнээҕэр кэрэ сэбэрэлэнэн, точуонай бөгүүрэлэнэн тутталлара-хапталлара уларыйбыта ыраатта, эн олор манна ордьойбут уолгун аһыйан ытыы-ытыы.
Руфина. Кырдьык кыраһыабай оҥорор буоллахтарына барыахха даҕаны, мин саҥа олоҕу саҕалыыбын!
Тоня. Маладьыас!
Үһүс көстүү
Тренажернай саала. Байбал хачайданарын быыһыгар быччыҥын таһааран хаартыскаҕа түһэрэр. Айдаар киирэр, илии тутуһар.
Байбал. Хайа, наа, маннык киһи баар эбит дуу?!
Айдаар. Баарбын-баарбын. Эн, красавчик, дьарык бөҕө дуу?
Байбал. Көрөрүҥ курдук. Хантан көһүннүҥ?
Айдаар. Хайа, ким да суох дуу? (Тула көрөр.) Һуу, айыка-айыка, сүрэҕим тохтуу сыста. Босс ханна баарый?
Байбал. Администратор, үлэҥ дьаабы дии, мин соҕотох дьарыктаммытым нэдиэлэ буолла.
Айдаар. Эс, оттон ааспыкка кыыс бөҕө баара дии. (Төлөпүөнүн көрөр.)
Байбал. Эн бүтэһигин хаһан үлэлээбиккин өйдүүгүн дуо?
Аполлон киирэн кэлэр.
Аполлон (хаһыытыы быластаан.) Айдаар! Тыыннаах эбиккин дуу, дьиккэр! (Эккирэтэр.)
Айдаар. Тыыннаахпын, тыыннаахпын. (Куотар.)
Аполлон. Хайдах эппиэтинэһэ суох сүтэн хаалаҕын? Эрий да эрий, ватсаптаа да ватсаптаа.
Айдаар. Ээ, оттон биир сиргэ…
Аполлон. Баҕар, икки да сиргэ сырыт! Үлэҕэр эппиэтинэстээх буолуоххун! Үлэ тохтоото дии, арендабытын да төлүүр харчыта суох олоробут, дьиикэй!
Айдаар. Все будет исправлено, босс! Көннөрүөхпүт барытын. (Төлөпүөнүн көрдөрөр.) Бу реклама суруйа олоробун, акцията биллэриэххэ, сразу кэлиэхтэрэ, көрөөр даҕаны.
Аполлон. Оборот ыларгар нэдиэлэ биэрэбин.
Айдаар. Өйдөөтүм, өйдөөтүм. Көр, ол уже кыргыттар иһэллэр.
Аполлон кыыһыран түргэнник тахсан барар. Кыргыттар киирэн кэлэллэр.
Тоня. Приветтэрин!
Руфина. Здравствуйте!
Айдаар. Дорооболоруҥ, кыргыттар!
Байбал. Оо, привет, кырасаабысса!
Тоня. Привет! Дьарыктана кэллибит.
Айдаар. Бэрт дии! Киириҥ, дьиэҕит курдук сананыҥ. Эн биһиэхэ саҥа сылдьаҕын дии!
Руфина. Саҥа кэллим.
Байбал. Окей. (Тахсан бараллар.)
Тоня. Оттон босскут ыксаан-тиэтэйэн ханна барда? Кирилиэскэ түҥнэри көтө сыста дии.
Айдаар. Кэлиэ сотору. Миигин ахтыбыта буолуо диэбитим, олох да Аполлону эрэ сураһаҕын дуу? (Чугаһыыр.)
Тоня. Ха-ха, онон-манан киирбэккэ-тахсыбакка көмөлөс миэхэ уонна уһул манна. (Төлөпүөнүн биэрэр.)
Айдаар. Тоҕо бэрдэй! Туоххун уһулабын?
Тоня. Дьарыктанарбын!
Айдаар. Таҥас устарга көмөлөһүннэрэрэ буолуо диэн үөрбүтүм баара…
Тоня. Тохтуур инигин, өссө киһини сыгынньахтаары гыммыт дии!
Айдаар. Хайдах тохтоон хаалыахпыный, алдьаммыт чаһыга дылы.
Тоня. Мин таҥаспын устуоххун баҕардаххына, бастаан төбөм оройуттан атаҕым тилэҕэр диэри шика-а-рно таҥыннарыаххын наада! Өйдөөтүҥ?
Айдаар. Ээх-ээх, чэ, дьарыктанан ис дуу, хайаа дуу. (Тэйэр.) Тугу баттыыбын?
Тоня. Уһуллуҥ дуо?
Айдаар. Ыйыппакка эрэ дьарыктанан иһиэххин! Барытын комментарийдаан түһэн.
Руфина кэлэр.
Айдаар. Оттон эн аатыҥ ким диэний?
Руфина. Руфина диэммин.
Айдаар. Наһаа оригинальнай ааттаах эбиккин. Мин Айдаар Хахаевич диэммин, эйиэхэ эрэ просто Айдаар диэн буолуом. А так бу зал туллар тутааҕа мин буолабын. Чэ, залга ааһыҥ.
Байбал. Саҥа кыыска туох ааттаах киэптээтиҥ?
Айдаар. Көрбөккүн да эмэһэ да суох, түөс да суох, иҥиир да суох – туох да суох. Ол аата ханна да дьарыктанаахтаабатах, бомбическай подругатын батыһан кэлбит.
Байбал. Чүөчэлэргэ олох спец буолан иһэҕин дуу?
Айдаар. Буолумуна, мин курдук күнү быһа чүөчэлэргэ буккулларыҥ буоллар, эн да буолуоҥ этэ.
Байбал. Үчүгэй үлэлээххин дьэ.
Айдаар. Сылайабын ээ арыт. Гаремҥа евнух курдук сананабын, особенно ити Тоня курдук штучкалары кытта алтыстахпына.
Байбал. Биир эмэ кыыһы тутаҥҥын ыал буолуоххун.
Айдаар. Эрдээ-эрдэ, нокоо. Сылдьа түһэн, дьиэ-уот оҥостон, массыыналанан, сири-дойдуну кэрийэн, олоҕу амсайа түһэн баран ыал буолбут киһи. Ойох диэн ороскуот буоллаҕа дии, оҕо өссө улахан ороскуот.
Байбал. Салгыы маннык сүтэ-сүтэ көһүннэххинэ, массыыналаныаххар, дьиэлэниэххэр диэри тоҥхойо кырдьаҕын буоллаҕа дии. Онтон ойох ылар да туһата суох буолуо, оҕо да оҥорор кыаллыбат буолар ини.
Айдаар. Наһаалаама эрэ, хата бэйэҥ оттон хаһан ойохтоноҕун?
Байбал. Аналлаахпын көрсөрүм буоллар, куоттарбат эр бэрдэ буолуом.
Айдаар. Аныгы үйэ тэтимэ түргэн. Холбоһор да түргэн, арахсар да түргэн. Олох оннук. Мобильнай. Биир күн ат арҕаһыгар, биир күн ат өрөҕөтүгэр, олох оннук буолан турар. Оттон бэйэҥ тулаҥ барыта кыыс дии, тоҕо аналлааххын булбатыҥ?
Байбал. Билигин барыта харах баайыыта. Эдэр диэбитиҥ – саастаах, кэрэ диэбитиҥ – мөкү. Оҥостуу эрэ күүһүнэн. Хахтара барыта биир. Өйдөөн көрүүй, үтүктүһэ-үтүктүһэ диетаҕа олороллор, харах биитэ оҥортороллор, хаас уруһуйдаталлар, уос улаатыннараллар, тэрбэччи кыламан кэтэллэр, түөс кэтэллэр, эмэһэ хачайданаллар. Миэхэ айылҕаттан бэйэтинэн кэрэ, кырааска-самааска умньамматах, духуу сытынан тунуйбатах, баары-баарынан сылдьар, майгытынан кытары кэрэ, кэтэх санаата суох дьиҥнээх дьахтар наада. Оннугу буллахпына, тута ЗАГС-ка барыам.
Айдаар. Бачча кырасаапчык, простушканы буллаххына, уһаабатыҥ буолуо.
Байбал. Оннук буолбатах, билиҥҥи кыргыттары өйдөөн көр – тас дьүһүннэрэ бары биирдэр, инкубатортан тахсыбыт курдуктар. Биир тугу эрэ гынна да, күрэхтэһэ-күрэхтэһэ үтүктүспүтүнэн бараллар.
Айдаар. Туох эрэ баар-баар.
Аполлон киирэн кэлэр.
Аполлон. Бу да дьон, бириэмэ – харчы, тугу ньамалаһа олороҕут!
Айдаар. Олохпут инникитин торумнуу олоробут.
Аполлон. Залбыт дьылҕатын торумнуоххайыҥ. Конкуренцияттан хайдах инники тахсары эҥин. Айдаар, үчүгэй реклама наада. Байбал, бэйэҥ эрэ дьарыктана олоруоҥ дуо? Финансовай дьааматтан хайдах тахсары тобулуохха наада.
Айдаар. Хата, бу красотканы таһаарыахха эрэ сторизка, Байбуусикпытын эмиэ. Ок, страницабыт уже тиллэн эрэр, уолаттар! Ок-сиэ, лайк, лайк, олох аҕыйах сөкүүндэ иһигэр лайкпыт фейерверк курдук ытыалаан барда. Һуу, кырдьаҕаскыт оҥорор буо, оҥороор! Чэ эрэ, өрүөллэр, чугаһааҥ эрэ манна, селфилиэххэйиҥ! Воо, уже лайк бөҕө баттаан эрэллэр.
Аполлон. Ок-сиэ! Көрдөр, көрдөр эрэ ити кыыһы, билигин мантан тахсан барбыт кыыс дуо?
Байбал. Кини дии.
Аполлон. Страницатын арый эрэ. (Соһуйар.) Айабыан, сурутааччыта тугун элбэҕэй!
Байбал. Блогер эбит.
Айдаар. Ама? Мин хаһан да, ханна да көрбөтөх кыыһым. Блогер буолбатах, ол чуолкай.
Аполлон. Чэ, ол неважно! Кэргэннээх дуу?
Байбал. Хайа, наа, бу киһи соһуччу ыйытыыларданна.
Айдаар. Билигин көрүөхпүт.
Байбал. Суох эбит.
Аполлон. Уларыс эрэ төлөпүөҥҥүн. Банальнай баҕайы публикациялардаах эбит, реклама игин мэлигир. Баар этэ-э!
Айдаар. Туох?
Аполлон. Ватсабын нүөмэрэ.
Байбал. Тугу эмиэ эмискэ баҕайы толкуйдаатыҥ?
Аполлон. А так кыраһыабай кыыс эбит ээ.
Байбал. Чэ-чэ, балаҕан аайы баар кыыс.
Айдаар. Байбал сөпкө этэр, кыыс курдук кыыс.
Аполлон. Чэ, эһиги үлэлээҥ, уолаттар, мин эһигини аралдьытымыым. Налоговай диэки газтаатым.
Төрдүс көстүү
Кыргыттар дьиэлэрэ. Дьарык кэнниттэн сылайбыт-элэйбит дьон киирэллэр.
Руфина. Тугу астанабыт?
Тоня. Сылайдахпыын! Айуу, бачча дьарык кэнниттэн тугу астаныахпытый? Инстанан пиццата сакаастыахха!
Руфина. Этимэ, наһаа үчүгэйдик дьарыктанныбыт дии.
Тоня. Эппитим дии, спорт туһалаах диэн. Кыыс оҥостон баран комплимент бөҕө ыллыҥ дии.
Руфина. Бэйэм да кыбыста сыстым, хайдах эрэ интэриэһинэй баҕайы эбит.
Тоня. Аныгы үйэҕэ тас көстүү проблема буолбатах, доҕоччуок.
Руфина (төлөпүөнүгэр көрүнэр.) Дьэ кырдьык оннук эбит.
Тоня. Даа, красавчикпын көрбөтүм дии үчүгэйдик.
Руфина. Кими?
Тоня. Оттон биһиги тахсан истэхпитинэ, утары киирбит уолу этэбин.
Руфина. Аа өйдөөтүм, кини туһунан кэпсээччигин дуо?
Тоня. Кини туһунан кэпсээччибин! Эрийэн ылбыт киһи, наһаа красавчик дьээдьэ.
Руфина төлөпүөнугар смс кэлэр.
Руфина. Билбэт номербыттан смс кэллэ.
Тоня. Айуу-чэ!
Руфина суруйсар.
Привет!
Билсиһиэххэ син дуо?
Аполлон диэммин. (Үөрбүт смайлик.)
Эппиэттээриий, кырасаабысса. (Хомойбут смайлик.)
Руфина. Билсэбит дуо диир, Аполлон диэн үһү.
Тоня. Аполлон дуо? Көрдөр эрэ.
Руфина. Били мааҕыҥҥы киһи дуо?
Тоня. Аватыгар кини дии.
Руфина. Эйигин буккуйбут быһыылаах.
Тоня. Миигин билэр этэ дии, уларыс эрэ.
Руфина. Хайыыгыный?
Тоня. Суруйуохха эрэ дьээбэҕэ.
Привет! Руфина диэммин. Кими да кытары буккуйбатыҥ дуо?
Суох.
Нүөмэрбин хантан ыллыҥ?
Инстаграмтан.
Таптыыр киһилээххин дуо?
Баар буолумуна!
Руфина. Тугу, тугу суруйдуҥ? Тоҕо сымыйалаатыҥ!
Тоня. Кырдьыгы суруйдум! Мааҕын сарсыарда эрэ атын уолтан сылтаан ытаан сыҥсыйа олорбутуҥ!
Руфина. Хайдах буоллуҥ, Тоня? Бэйэҥ эппитиҥ дии пройдохалары көрүмэ диэн.
Тоня. Араастаан кыймаҥнааҥҥын мин ыра санаа оҥостор киһибин былдьаан эрэр эбиккин!
Руфина. Мин кими да былдьыы иликпин, наадалаах этэ эн Аполлонуҥ!
Тоня. Наадалаах буолумуна! Таҥнарыахсыт эбиккин! Ыарахан күннэргэр өйөтөн, хараҕыҥ уутун сотторон, куукула курдук киэргэттэрэн-симэттэрэн баран эппиэтиҥ итинник эбит! Хайа, кырааскаҕын сууннаххына сирэйиҥ оннугар түһэр ини.
Руфина. Тоня, бүт!
Тоня. Аҕал сапожкабын, платьебын уонна киэргэллэрбин, төлөпүөммүн эмиэ.
Руфина. Сөп чэ, Тоня, өйдөөтүм. Мэ, харай уонна бар! Салгыы сатаан дьүөгэлэспэппит.
Тоня. Үүрэбин диэ! Дьүөгэ ааттаах, махтаныаҥ оннугар ити баар. Көрүөхпүт ээ, миигинэ суох хайдах марбайан олороргун. (Тахсан барар.)
Руфина (сирэйин саба туттан ытыахча буолан иһэн хараҕын уутун туора соттор, сиэркилэҕэ көрүнэр). Хас хамсыыртан барытыттан маннык ытаан сыҥсыйан истэхпинэ, тугу ситиһиэхпиний? Чэ, көрүөхпүт ким марбайарын. (Кырааскаланан барар.) Мантан ыла маркаҕын ыһыктыбакка тутуоххун наада, Руфина Иннокентьевна! Хас биирдии түгэни сиргэ түһэрбэккэ, олох тэтимигэр тэҥнии тутары мин да сатыыр инибин. Миэхэ үчүгэй төлөпүөн наада эбит. (Чаһытын көрөр.) Бириэмэ син баар эбит. (Сонун кэтэн, суумкатын ылан тахсан барар.)
Бэһис көстүү
Спортзал. Аполлон Байбаллыын, өссө хас да киһи дьарыктана сылдьаллар.
Байбал. Хайа, тус олоххор ситиһии бөҕөҕүн дуу Руфиналыын? Страницата барыта биһиги кулууппут буолбут дии.
Аполлон. Олох үчүгэйбит. Күн аайы романтикалыы таарыйа культурнай сынньалаҥ – театр, киинэ, музей, паарка. Аҕыйах күн иһигэр онно-манна кэрийбэхтээтибит. Доҕоор, наһаа интэриэһинэй куоракка олорор эбиппит диэн санааҕа кэллим.
Байбал. Сирэйгиттэн көрдөххө, дьол үс тыһыынчаҕын дии! Иэстэргин даҕаны умна быһыытыйдыҥ дуу?
Аполлон. Эйиэхэ диэн эттэхпинэ, үчүгэйи уонна туһалааҕы холбуу тутабын. Үрдүк хамнастаах, дьиэлээх-уоттаах, тас дьүһүнэ кыраһыабай уонна майгыта миэхэ сөп түбэһэр. Прицебэ, прошлайа суох кыыс. Маннык кыыһы хантан булуохпунуй, аныгы үйэҕэ?
Байбал. Һы, прицеп буолан. Оҕону прицеп диигин дуо?! Мин истэрбэр хаһан даҕаны итинник диэбэт буол. Оҕо ийэтигэр прицеп буоларыгар бу эһиги курдук дьахталлары кэһэ сылдьар эппиэтинэһэ суох ыттар буруйдаахтар дии саныыбын!
Аполлон. Аргыый эрэ, дыа! Кими ыт диигиний?
Айдаар киирэр, араартыыр.
Айдаар. Уолаттар, туох буоллугут? (Байбал тахсар.)
Аполлон. Руфинаны прицебэ суох диэбиппэр кыыһыран турда.
Айдаар. Оо дьэ! Бааһын таарыйбыккын! Аҕата суох, маачаха аҕаҕа иитиллибитэ дии.
Аполлон. Мин туох буруйдаахпыный, кини маачахатыттан атаҕастаммытыгар?
Айдаар. Уоскуй чэ, туох ааттаах, кыра аайыттан кыыһырсымаҥ.
Аполлон. Ээ, чэ хааллын ити. Хата эн миэхэ дьылҕабын быһаарар дьыалабар көмөлөс эрэ.
Айдаар. Туохха?
Аполлон. Эн диэн абытайдаах романтик буоллаҕыҥ дии! Миэхэ кыыс ууллан баран тохтон хаалар гына тапталга билиниитэ суруй эрэ!
Айдаар. Оо дьэ, ону бичийэргэ бириэмэ наада, иэйии наада, чуумпу наада. Суох-суох, кыайан ылсыбаппын, көрөрүҥ курдук үлэ да үлэ.
Аполлон. Биир күн отгульнай уонна оттон биллэн турар гонорар төлүүбүн.
Айдаар. Гонорар диэ… Сөп. Оччоҕо сарсын отгул ылабын, аҕал илиигин. (Илии тутуһаллар.)
Алтыс көстүү
Ресторан. Таһырдьа бөртөлүөт тыаһыыр. Аполлон Руфиналыын сиэттиһэн киирэн кэлэллэр. Лакей ааны арыйар, остуолларын ыйан биэрэр. Тыыннаах музыка оонньоон барар. Кырыымпаһыттар. Саксофон. Розанан симэммит саала. Штативка видеонан устааччы.
Аполлон. Күнүм-ыйым, Руфина! Эн сибэкки курдук кэрэчээн бэйэҕин, саҥа тахсар күн сарыалын курдук истиҥ мичээргин сүрэхпинэн сөбүлээн, харахпынан хайҕаан эйигин олус күүскэ таптаатым! Дьылҕам эриирдээх суолугар миигин кытары тэҥҥэ үктэнэр олоҕум аргыһа, таптыыр кэргэним, оҕолорум ийэлэрэ, сиэннэрим эбэлэрэ буолуоҥ дуо?
Руфина. Аполлон! Наһаа да романтичнай барыта! Олох поэт эбиккин! Наһаа астык, наһаа үчүгэй, барыта түүл курдук. (Корзиналаахроза аҕалаллар, Аполлон сиэбиттэн биһилэх таһаарар.)
Аполлон. Эн эрэ нарын тарбахтаргар ананан оҥоһуллубут биһилэххэ умайа тыгар бриллиант эн харахтаргын дьолунан толордун! Бу биһилэх бүтэр уһуга суоҕун курдук мин эйиэхэ тапталым муҥура суох. Руфина, миэхэ кэргэн таҕыс!
Руфина. Уо-аа-аай! (Аполлон биһилэҕин кэтэрдэр.) Наһаа шикарнай дии! Аполло-о-о-н… Мин эйигин эмиэ таптыыбын… гынан баран… Толкуйдуом дии?
Аполлон. Өйдөөбөтүм. (Куолаһа уларыйар.) Руфина! (Операторга.) Уһулан бүт! Стоп! Тохтооҥ! (Музыканнар тохтууллар.)
Руфина. Аполлон, оттон…
Аполлон. Дыа, хаһан толкуйдуугун? Биһиги билсибиппит, сылдьыбыппыт номнуо икки ый буолла ээ! Мин курдук красавчикка ол вообще рекорд! Бу тухары тугу толкуйдуу сырыттыҥ уопсайынан?
Руфина. Тохтоорууй!
Аполлон. Руфина, эн билэҕин дуо мин төһө харчыны бу манна барытыгар куппуппун! Эн толкуйдуом дииргин истээри дуо? Билэҕин дуо, бу залы төһөҕө арендалаабыппын? Вертолет чааһа төһө сыаналааҕын? Бу кэтэн олорор биһилэҕиҥ сыанатын билэҕин? Оттон бу тыыннаах музыка сыанатын? Билэҕин?
Руфина. Тоҕо эн миэхэ бардьыгыныыгыный? (Туран кэлэр.)
Аполлон (сымныыр, ытамньыйар.) Руфина, Руфиночка! Уоскуйуохха! Соҕотох эйиэхэ эрэ бу күн сиригэр хайдахтаах да элбэх харчыны харыстаабаппын дии – бу барыта эйиэхэ анаан. Сибэккичээниэм!
Руфина. Түһүү сытабын быһыылаах, Аполлон! Ыра санаа дии барыта!
Аполлон. Сөбүлэспэт буоллаххына… (Куолаһа титириир.)
Руфина. Сөбүлэһэбин, Аполлон, сөбүлэһэбин. Мин эйиэхэ кэргэн, оҕолоргор ийэ, сиэннэргэр эбээ, хос сиэннэргэр хос эбээ, хос-хос сиэннэргэр…
Аполлон. Һуу, хата! (Куолаһа чөлүгэр түһэр.) Тохтоо, Руфина! Оператор, саҥаттан уһул эрэ, сторизка прямой эфиры холбоор. Руфина, саҥаттан сөбүлэһээр, только кылгастык, хос-хос сиэн игин диэбэккэ. Чэ эрэ, биир, икки, үс, барда. Эн эрэ нарын тарбахтаргар ананан оҥоһуллубут биһилэххэ умайа тыгар бриллиант эн харахтаргын дьолунан толордун. Бу биһилэх бүтэр уһуга суоҕун курдук мин эйиэхэ тапталым муҥура суох. Руфина, миэхэ кэргэн таҕыс!
Руфина. Аполлон, мин сөбүлэһэбин, мин эйиэхэ кэргэн тахсабын.
Сампаан арыллар, Мендельсон марша тыаһыыр. Биһилэх кэтэллэр, бука бары доҕотторо, дьонноро киирэн илии тутуһаллар, эҕэрдэлииллэр, кэмбиэрдэри биэрэллэр, хаартыскаҕа түһэллэр. Аполлон Руфинаны көтөҕөн ылан тахсан барар.
Сэттис көстүү
Атын аанынан утуйар хоско киирэр. Ороҥҥо олордор уонна сыллаан, уураан, имэрийэн барар.
Руфина. Тохтоо, Аполлон! Оттон биһиги тоҕо дьон курдук загсаламмакка эрэ сыбаайбалаатыбытый? Сурутааччыларбар туох диибиний?
Аполлон. ЗАГС ханна да куоппат, турбутун курдук туруо, үлэлээбитин курдук үлэлиэ! Оттон эйигин атын муҥхаһыттар балыкчааны курдук тутан ылыахтара!
Руфина. Наһаа дьикти! Оо дьэ, тохтоо эрэ, туох ааттаах!
Аполлон. Тохтотума, Руфина, бүгүн эн биһикки бастакы түүммүт уонна биир улахан сыаллаах-соруктаах бу ороҥҥо бииргэ буолабыт.
Руфина. Тохтоо эрэ… туох ааттаах! Аполлон!
Аполлон. Сөп чэ, ыксаабат буоллаххына, маннык гыныахха. Сыбаайбаттан киирбит харчыны таһаарыахха уонна ааҕыахха!
Руфина. Кырдьык даҕаны. (Харчыларын кэмбиэртэн таһаартыы-таһаартыы ааҕан бараллар.) Уоай, бу наһаа үчүгэй открыткалаах мин университекка бииргэ үөрэммит кыргыттарым биэрбиттэр, уоаай, биир, икки, үс, түөрт, биэс, уой, отут тыһыынча!
Аполлон. Ээ бу чараас баҕайы кэмбиэр кимиэнэй? Көрүөххэ эрэ. Оо, биэс эрэ тыһыынча уонна ынырык элбэх подписьтаах эҥин.
Руфина. Аҕал эрэ манна, оо дьэ, бу мин дэриэбинэтээҕи ыалларым бэлэхтэрэ.
Аполлон. Эйиэнэ төһө буолла?
Руфина. Сүүс сүүрбэ.
Аполлон. Миэнэ икки сүүстэн таҕыста. Бытаан баҕайытык ааҕар эбиккин, Руффи.
Руфина. Дьоҕус көрсүһүү диэтэххэ, үс сүүстэн тахса киирбит эбит, ханна эрэ айанныахха!
Аполлон. Чурапчыга, мин дьоммор. Оттуу, дьэдьэннии, моонньоҕоннуу.
Руфина. Ханна диигин?
Аполлон. Ээ, оччоҕо эн дойдугар барыахха, саҥа аймахтары кытта билсэ таарыйа.
Руфина. Аполлон! Мин кыраныысса таһыгар айан туһунан этэбин!
Аполлон. Бүт эрэ, хайдах бизнеспын барытын быраҕан баран кыраныысса таһыгар баран хаалыахпыный? Ороскуота да бэрт. Арба хата залым арендатын төлүүр киһи буоллум!
Руфина. Залыҥ даа? Оттон барыта бэйэм киэнэ, собственность диэбэтэҕиҥ дуо?
Аполлон. Ээ, хайдах бэйэм киэнэ буолуой? Куортамныыбын. Хата манна көһөн кэлэммин, дьиэ куортамнаан бүтэбин, һуу!
Руфина. Хайдах ол аата? Дьиэҕин эмиэ куортамныы сылдьыбытыҥ дуо?
Аполлон. Куортамнаан, оттон билигин эйиэхэ олорор буоллахпыт дии, туох ааттаах айманныҥ?
Руфина. Мин эдьиийим дьиэтигэр олорбутум, эдьиийим кэргэн тахсан эрэр үһү, квартирабын босхолоор диэбитэ. Эйиэхэ олоруохпут дии санаабытым.
Аполлон. Пахай, доҕор! Ол эдьиийиҥ акаары дуо, бу аныгы үйэҕэ дьиэтэ-уота суох хаамаайы киһиэхэ эргэ барар?
Руфина. Бэйэҕин көрүүй!
Аполлон. Мин перспективалаах уол буоллаҕым дии!
Руфина. Көрүөхпүт чэ, перспективаҕын. (Төлөпүөнүн көрөр.) Лайк бөҕө, сыбаайба кэнниттэн олох умайан эрэр дии төлөпүөнүм.
Аполлон. Чэ маннык гыныахха, иккиэн төлөпүөн ылыахха, кредиккэ киирбэккэ эрэ уу харчынан. «Айфон 11 Про» ылабыт?
Руфина. Ии, кырдьык, оннук гыныахха!
Аполлон. Мин наһаа сылайдым.
Руфина. Мин эмиэ сылайдым, утуйуохха.
Аполлон. Минньигэс түүллэри!
Руфина. Эйиэхэ эмиэ.
Орон икки кытыытынан, бэйэ-бэйэлэригэр төттөрү хайыһан баран утуйан хаалаллар.
Ахсыс көстүү
Спортзал. Аполлон киирэн уолаттары кытары
илии тутуһар.
Аполлон. Уолаттар, иэспитин төлөөтүбүт!
Айдаар. Хайа, наа, проламмыккын дуу?
Байбал. Айабыан!
Аполлон. Селфилиэххэ!
Айдаар. Кредит ыллыҥ дуо?
Аполлон. Ыраас харчынан, доҕоор, ыраас харчынан.
Байбал. Сыбаайбам харчытынан диэриий.
Аполлон. Туох да харчыта буоллун, кылаабынайа – иэстэр төлөннүлэр.
Байбал. Санааҥ сиппит! Эҕэрдэ!
Айдаар. Биир маннык идея киирдэ.
Аполлон. Дьэ эрэ!
Айдаар. Уолаттар, уопсайынан кэҥиирбит уолдьаста. Ханна да баппат үлүгэр элбэх киһи сылдьар буолла. Уонна эбии кафе боппуруоһун быһаарыахха, дьэ уонна тэллэй курдук үүнэн-тэнийэн барабыт.
Байбал. Правильнай питание кафета?
Айдаар. ПП буолбатах, именно сыалаах-арыылаах, минньигэс сыттаах-сымардаах аһылыктаах.
Аполлон. Бэрт идея эбит!
Айдаар. Өссө кулууп клиеннэригэр уон бырыһыаннаах чэпчэтии биэриэхпит. Руфина страницата дьыаланы оҥоруо.
Аполлон. Онно харчы наада дии.
Айдаар. Боруобалаан көрүөххэ, мин ылсыам, Байбал залга хаалыа буоллаҕа. Аны туран бизнес тэринэргэ субсидия бөҕө көрүллүбүт. Урут бииргэ үөрэммит уолум онон дьарыктанар. Киниэхэ сүбэлэтэн баран чөл олох пропагандатыгар бизнес-план суруйабыт. Аполлон, көмүскүүгүн. Субсидияны ыллахпыт ити!
Байбал. Айдаар, баһыттан атаҕар диэри барытын толкуйдаан, уол оҕотоҕун дии!
Айдаар. Түргэнник хамсаныахха наада.
Аполлон. Чэ уолаттар бизнес сайдарын туһугар селфилиэххэйиҥ!
Тохсус көстүү
Руфиналаах квартиралара. Аныгылыы оҥоһуулаах студия-квартира. Аҥаарыгар утуйар хос – улахан орон, иккис аҥаара – куукуна-гостинай. Дьиэлээх хотун оронугар сытар, иннигэр – төлөпүөнэ.
Руфина. Үтүө сарсыарданан, сурутааччыларым! Уой, күнүс буолбут эбит, тапталлааҕым кэлэрэ чугаһаабыт, аспын астыы охсуохпун наада. Киэһэ аҕыс чааска быһа эфиргэ тахсыам, холбонон көрөөрүҥ, күүтэбин.
Алло! «Сууй-сот» компания дуо? Бу Руфинабын. Дуогабардаах этибит дии, миэхэ суһаллык дьиэ хомуйар өҥө оҥоһуллуон наада буолла. Мобильная уулусса 45 нүөмэрдээх дьиэтэ, сэттис этээс, сүүрбэ биирис квартира. Махтал! Биир дьыала быһаарылынна.
Алло, здравствуйте! «Тот ас» дуо? Бу Руфина эрийэбин. Мин, мин. Баһаалыста, миэхэ ити ааспыттааҕы сакааһым курдук эттээх, оҕуруот астаах соккуойу аҕалыаххыт? Фасоль, брокколи буоллун. Домашняй соҕустук астаарыҥ. Махтал! (Төлөпүөн тыаһыыр.)
Алло! Эбээ привет! Эн кэллиҥ дуо? Биир подъездтаах дьиэ, лиибинэн тахсаар. Көрсүөм билигин. (Араарар.) Арба, эбээм кэлэрин олох даҕаны умнан кэбиспиппин дии!
Аан чуораана тыаһыыр.
Аана. Иэ, сиэним барахсан! Дорообо, тоойуом!
Руфина. Эбээ, привет! (Куустуһаллар.) Киир, баһаалыста.
Аана. Оҕолорбор бу кэһиибин аҕаллым! Саха аһын аҕыннахтара диэммин. (Суумкатыттан оруур.) Бу бүгүҥҥү сип-сибиэһэй сүөгэй, бу балык, бу эт. Хата, бэҕэһээ Ньукулаайаптар ынахтарын өлөрөн эт атыылаабыттара, онтон ылан аҕаллым. Бу бэрэски, кыра сылдьан сөбүлээн сиир бэчиэнньэҕин астаан аҕаллым.
Руфина. Махтал, эбээ!
Аана. Эриҥ үлэтигэр сылдьар дуо?
Руфина. Аһа, үлэтигэр.
Аан чуораана тыаһыыр, биэдэрэлээх тирээпкэлээх кыыс киирэн сууйан-сотон киирэн барар.
Аана. Хайаларай ити?
Руфина. Ити клининговай хампаанньа үлэһитэ.
Аана. Дьиэ сууйа кэллэ дуо? Эчи, дьиибэтин.
Руфина. Оттон эбээ, бэҕэһээ эрэ тыҥырах оҥорторбутум, көрүүй бу. Алдьанан хаалыа дии уонна дьиэ сууйар-хомуйар наһаа элбэх бириэмэбин ылар.
Аана. Аата, муокаһын! Чэйдиэххэ эрэ, айаннаан дэлби аччыктаан кэллим.
Руфина. Эбээ, кыратык күүтүөххэ дии, билигин ас аҕалыахтара. (Аан чуораана лыҥкыныыр, Руфина арыйар.) Картанан ылаҕыт? Махтал!
Аана. Ким кэллэ?
Руфина. Эбиэт аҕаллылар.
Аана. Эбиэт даа? Аһы баҕас астыыр оҕо этиҥ дии!
Руфина. Эбээ, баһаалыста, мөҕүмэ. Бириэмэ олох туохха да тиийбэт.
Аана. Аата, дьиктитин! Эмиэ да дьиэҕэр бааргын дии.
Руфина. Үлэлии сылдьабын, эбээ, дьиэттэн олорон дистанционно үлэлиибин.
Аана. Дьэ, дьээбэ олох кэлбит эбит.
Руфина. Оттон үлэлээбэтэхпинэ, харчыбыт туохха да тиийбэт. Мин үлэм үксэ интернет нөҥүө.
Аана. Мин сатаан өйдөөбөппүн, интэриниэт да интэриниэт диигит даҕаны. Урут биһиги онто да суох олорбуппут, үлэлээбиппит.
Руфина. Билигин олох атын, эбээ!
Аполлон киирэр.
Аполлон. Привет!
Руфина. Привет!
Аполлон. Уу, минньигэс даҕаны сыт кэлэр, аччыктаан аҕай кэллим.
Руфина. Эбээм кэллэ.
Аполлон. Анна Петровна, дорообо!
Аана. Дыраастый!
Руфина. Чэ аһыаҕыҥ! (Аполлон ньуоскатынан баһан ылан истэҕинэ, Руфина илиитин таарыйар.) Аполлон! Бастаан селфилээн баран аһыахха наада. Эбээ, бу диэки көр эрэ!
Остуол тула олороллор. Эдэрдэр төлөпүөннэрин таһааран көрөн бараллар. Төлөпүөн сирэйиттэн харахтарын араарбакка аһыыллар.
Аполлон. Оо!
Руфина. Ханна баарый?
Аполлон. Криминалга.
Руфина. Фуу! (Сирэйин куһаҕаннык туттар.) Айуу-чэ! (Сэргэхсийэр.)
Аполлон. Ханна?
Руфина. Якт.
Аполлон. Хата, диэ (Күлэр.)
Аана (тэриэлкэлээх аһыттан амсайан көрөн баран чэйин иһэр, нэһиилэ ыйыстар. Аһын баран булкуйа-булкуйа олорбохтоон баран көхсүн этитэр.) Туох дьикти аһын аһыыгытый? Эрбэһиҥҥэ дылы буолан түһэн. Аны куппут чэйгит үүтэ да суох, өҥө да суох – уу ньамаҕар дылы көҕөрө сытыйан.
Руфина Аполлоннуун төлөпүөннэригэр умса түһэн баран олороллор. Аана сиэнин, онтон күтүөтүн диэки көрө сатаан баран ньуоскатын остуолга тыастаахтык быраҕар.
Аана. Эдэрдэр!
Руфина. Уой! Туох диэтиҥ, эбээ!
Аполлон. Һуу, киһини куттаатыҥ!
Аана. Киһилии аһылыгы аһыаххытын диибин! Нохоо, өмүрэ олоруоҥ дуо, бэрэскитэ сиэн иһиэххин!
Аполлон. Бэрэски минньигэс бөҕө, эбээ!
Аана. Минньигэһин бэйэм да билэбин! Сиэн иһиэххин!
Аполлон. Наһаа сыалаах, элбэҕи сиэбэппин.
Аана. Бэрэскини сынньана-сынньана ыстыыр-ыстаабат сиир эр киһини саҥа көрөбүн.
Руфина. Эбээ, ити ыһаарыламмыт астары биһиги соччо биһирээбэппит. Наһаа үрдүк калорийдаахтар!
Аана. Һок сиэ! Биһиги саҕана эҥин араас дийиэтэ, холуоруй диэн суоҕа, сыалаах, сыата суох диэн араарбакка барытын аһыырбыт даҕаны, аныгы дьахталлар курдук иннэ-кэннэ биллибэт буолуор диэри туорабытынан баран төкүнүйбүппүт эмиэ суоҕа! Аныгы эр дьоммут кытары дийиэтэлиир буолбут муҥнаахтар!
Руфина. Эбээ!
Аана. Чэ, кэбис, уһаабакка-кэҥээбэккэ барыыһыбын. Хайа да ыалга киир муннуларын төлөпүөҥҥэ анньан баран олорор ыччаттар эбиккит. Тылгытын таҥалайгытыттан араараргыт да ыарахан буолбут! Бакааларыҥ! (Тахсан барар.)
Руфина. Эбээ! Уже бардыҥ дуо? Мин атаарыым! (Эбэтин эккирэтэн атаарар.)
Аполлон. Оо, бүгүн матч буолар эбит.
Руфина. Аполлончик! Суох, футбол бүгүн буолбат!
Аполлон. Чэ, биирдэ эрэ чыычаах!
Руфина. Аполлончик, арба эн ити хайа дьахтары өрүү лайктыыгыный?
Аполлон. Айдаар биир кыыстыын билсибит, ону ыыппыт.
Руфина. Албыннаама!
Аполлон. Туох диэн албынныахпыный?
Руфина. Көрдөр эрэ ити кимниин кистии-кистии ватсаптаһа олороҕунуй?
Аполлон. Сарбаҥнаама.
Руфина. Өссө сарбаҥнаама диигин даа?
Былдьаһыы түмүгэр төлөпүөн экранынан баран сиргэ түһэр.
Аполлон. Дьиикэй дьахтара! Алдьаттыҥ буолбат дуо экраммын. (Хабарҕалыыр.)
Руфина. Ыыт, ыыт диибин! (Тыына хаайтарар, онтон төлөпүөнү ороҥҥо быраҕар.) Ыалдьар буолбат дуо, ыт! (Ытыыр.) Иирээки!
Аполлон. Хата бэйэҥ ыккын! (Төлөпүөнүн экранын имэрийэр.) Хайа тардыы суола хаалла!
Руфина суһаллык ойон туран төлөпүөнүнэн
эрийэн барар.
Руфина. Алло, полиция! Миигин кэргэним кырбаата! Өйдөөх сылдьан, төлөпүөнтэн сылтаан! Мобильная уулусса түөрт уон биэһэ.
Аполлон. Чэ, бырастыы гын, чыычаах! Мин наһаа куһаҕаннык быһыыланным. Мантан ыла эйигин эрэ лайктыам, мин кып-кырачаан уонна акаарычаан Лайкчаанам. Көрөҕүн, мин эйигин наһаа күүскэ таптыырбын.
Руфина. Бастакытын уонна бүтэһигин бырастыы гынабын. Өйдөөтүҥ? Мин аччыктаатым!
Аполлон. Оттон диетабыт? Чэ, буоллун, мин пицца заказтыыбын? Суши дуу?
Руфина. Туорт!
Аполлон. Алло, туорт сакаастаатахпына аҕалаҕыт дуо? Сөп. (Иккистээн эрийэр.) Алло, туорт сакаастаары гынабын, үрдүгэр «Чыычаах, бырастыы гын!» диэн суруйуохха наада! Вот уонна лайк туруоруохха наада. Сүрэх, лайк… Оттон хаһан да туруорбатаҕыҥ дуо? Таак, аны сибэкки сакаастыахха. (Тоҥсуйаллар.) Оо, пицца, суши кэллэ! Аны туорт күүтэбит.
Быраастар киирэн кэлэллэр.
Быраас. Пострадавшай ханна баарый?
Руфина. Ханнык пострадавшай?
Быраас. Суһал көмөнү эһиэхэ ыҥырбыттара дуо?
Руфина. Барыта үчүгэй уже!
Быраас. Пострадавшай кимий?
Руфина. Мин. Уже үтүөрдүм.
Аполлон. Иһиттигит? Уже үтүөрдэ. Чэ, чэ! Минньигэс түүллэри!
Аан чуораана тыаһыыр.
Пицца да, уоай, махтал, махтал!
Курьер. Минньигэстик аһааҥ!
Астарын остуолга тардан аһаары олорон эрдэхтэринэ, аан чуораана тыаһыыр, курьер сибэкки аҕалар.
Аполлон. Чыычааҕыам, мин эйигин олус күүскэ таптыыбын!
Руфина. Махтал, мин эйигин эмиэ күүскэ таптыыбын! Барыта үчүгэй буолуоҕа!
Уураһан эрдэхтэринэ, аан чуораана тыаһыыр.
Аполлон. Эмиэ ким кэллэ?
Полиция үлэһиттэрэ киирэн кэлэллэр.
Полиция. Полиция сержана Дьяконов диэммин. Туох буоллугут?
Аполлон. Дьаах Лехаҕын дуо?
Полиция. Оттон эн Опп…
Аполлон. …олломмун. (Полиция атыҥыраабыт курдук туттар.) Мин, мин!
Хаһыытаһа түһэллэр, илии тутуһаллар.
Руфина. Бу кэргэммин кытары ииристим! Билигин барыта окей.
Полиция. Боротокуол толоробун. Ааккыт-суолгут ким диэний?
Руфина. Павлова Руфина Иннокентьевна.
Полиция. Паспорыҥ наада.
Руфина паспорын ыла хоско киирэр.
Аполлон. Хайыа, погоннаахтар эрээттэригэр киирбиккин дуу? Дьиҥнээх курдуккун.
Полиция. Армия кэнниттэн киирбитим дии.
Аполлон. Кэпсии түс, бачча көрсөн баран. Руфина, бу мин бэркэ билэр киһим Алексей, оттон бу – Руфина. Олох-дьаһах хайдаҕый?
Полиция. Кэминэн, үлэҕэ охтон баран сылдьабын. Эн?
Аполлон. Мин тренажернай зал арыйбытым, кэргэннэммитим…
Полиция. Кэргэннэммитиҥ дуо? (Соһуйан ойон турар.) Хайдах?
Аполлон (ситэри саҥардыбакка быһа түһэн.) Руфина, чыычаах, чэйдэ кут эрэ, ыалдьыппытыгар.
Руфина. Ыалдьыт буолан!
Полиция. Оттон…
Аполлон (сөбүлээбэтэхтии.) Туох ааттаах соһуйдуҥ?
Полиция. Дьоҥҥун кытары билсэҕин дуо?
Аполлон. Ханнык дьоммун? Ээ, һмм… билсэн буоллаҕа дии, сайын аайы бара сылдьабын. Барыта үчүгэй, Леха, өйдүүгүн?
Полиция. Туохха полицияланныгыт, барыта үчүгэй буоллаҕына?
Аполлон. Ээ, төлөпүөммүн хайа түһэрэн кэбистэ дии санааммын, алҕаска хабарҕалаан кэбистим.
Полиция. Оо, алдьаммыт дуо? Дьахталлар оттон итинниктэр, миэнэ эмиэ күнүүлээн чарбачыһааччы.
Руфина. Аполло-он, футбол буолара чугаһаата. (Паспорын аҕалан биэрэр.)
Полиция. Хайа, билигин да футболга фанаттыыгын дуу?
Аполлон. Фанаттаан буоллаҕа.
Полиция. Чэ, мин наһаа уһаары гынным, барыта үчүгэй буоллаҕына, Руфина Иннокентьевна, манна илиитэ баттаан кэбис.
Аполлон. Иллэҥ кэмҥэр дьарыктана кэлээр, бу визиткам. (Биэрэр.) Төлөпүөнүм нүөмэрэ сурулла сылдьар.
Полиция. Чэ, этэҥҥэ буолуҥ!
Аполлон. Леха, ол-бу диэн кэпсии сылдьаайаҕын.
Полиция. Һы, оннук киһи буолуо диигин дуо? (Леха тахсан иһэн эргиллэр.)
Аполлон. Махтал! Һуу, хайа чыычаах футболбут буолла дуо?
Руфина. Аполлон! Мин эйиэхэ биир улахан сонуну иһитиннэриэхпин баҕарабын!
Аполлон. Дьэ эрэ, болҕойобун!
Руфина. Эн биһи сотору ийэ уонна аҕа буолабыт.
Аполлон. Ха-хайдах?
Руфина. Оттон очень просто. Саҥа статуска бэлэмнэниэххэ эрэ. Селфи-и!
Аполлон. Эрдэ буолбатах дуо?
Руфина. Эрдэ диэн, ол аата туох диэри гынаҕын?
Аполлон. Чыычаах мин эйиэхэ биири этиэхпин баҕарабын… Хаһан эрэ син биир эн истиэҥ мин хайдах курдук эн иннигэр буруйдаахпын.
Руфина. Билэбин, Аполлон, билэбин. Эн кинини лайктаама! Мин уонна номнуо эйигин бырастыы гыммытым.
Аполлон. Руфина. Мин эйигин…
Руфина. Эн миигин олус күүскэ таптыыгын уонна мин аттыбар наһаа дьоллооххун! Мин билэбин.
Аполлон. Истиий миигин…
Руфина (кыыһырбыттыы.) Үөрбэтиҥ дуо, оччоҕо? Сөп, чэ!
Аполлон. Дьоллоохпун… Наһаа соһуччу этэҥҥин киһини долгутан кэбистиҥ.
Руфина (Аполлоҥҥа сыстар.) Мин кыыһы баҕарабын. Наһаа кыраһыабайдык куукула курдук таҥыннарыам! Моднай да моднай, мааны да мааны буолуоҕа! Онтон балетнай оскуолаҕа биэриэхпит, ээ, суох художественнай гимнастикаҕа эбит. Өссө английскай тылы олох күүскэ үөрэттэриэм. Модельнай студияҕа сылдьыа.
Аполлон. Ээ, мин оҕом уол! Улааттаҕына, спортсмен буолуо, тустуук эбэтэр боксер. Эбэтэр Месси курдук биллэр футболист. Уопсайынан, аан дойдуга биллиилээх киһи. Вообщем красавчик! Онуоха диэри бизнес тэнийиэ! Миэхэ көмө бөҕө буолуо этэ буоллаҕа!
Руфина. Ханнык детсадка биэрэбитий?
Аполлон. Пока чааһынай детсадка, онтон муниципальнайга.
Руфина. Муниципальнай диэн тоска дии, ынырык элбэх оҕо буолуо, биир группаҕа түөрт уон оҕо буолар үһү, ону биир эрэ иитээччи көрөр. Лучше саамай аныгы садикка биэриэхпит.
Аполлон. Муниципальнай садик ордук буоллаҕа дии, бары өттүнэн. Ороскуота да кыра, оҕо алтыһа үөрэнэр, былдьаһа-тараһа аһыыр, биир тылынан выживайдыы үөрэнэр!
Руфина. Уонна саамай үчүгэй оскуолаҕа биэриэххэ наада!
Аполлон. Сахалыы оскуолаҕа.
Руфина. Кылаабынайа – гимназия буолуон наада, нууччалыы да буоллун ээ.
Аполлон. Оскуолабытын талан баран дьиэ ылыныахпытын наада, билигин прописканан эрэ ылаллар.
Руфина. Оннук, оттон саҥа тутуллар кварталга ылыахха, онно саҥа оскуола тутуллуохтаах.
Аполлон. Оҕо сахалыы толкуйдуон наада, атын тылларга онтон үөрэниэ буоллаҕа.
Руфина. Нууччалыы саҥарара үчүгэй диибин, английскайдыы саҥарар буоллаҕына, олох үчүгэй! Биһиги курдук буолуо суоҕа, атын дойдуларынан сылдьыа, сири-дойдуну кэрийиэ…
Аполлон. Төрөөбүт тылынан саҥарар буоллаҕына, оччоҕо атын тыллары чэпчэкитик үөрэтиэ дии саныыбын.
Руфина. Оттон эн төрөөбүт тылгынан саҥараҕын даҕаны, омук тылынан кэпсэтэргин истэ иликпин баччааҥҥа диэри.
Аполлон. Оттон репетиторданыа буоллаҕа дии.
Руфина (үтүктэр.) Онно эмиэ харчы наада диэҕиҥ.
Аполлон (өһүргэнэр.) Бастаан төрөө – онтон иитиэхпит. Арба, уонна эр киһи дойдутугар олоро хаалыахтаах.
Руфина. Көрүөхпүт, чэ! Уой, аҕыс чугаһаабыт дии! Быһа эфиргэ тахсыахтаахпын, тугум да бэлэмэ суох!
Аполлон. Кытаат, кытаат! Һуу, саатар бүгүн футболбун көрөр инибин!
Онус көстүү
Хас да ый ааспыт. Аполлон бизнеһэ сайдыбыт. Былааннаабыта барыта олоххо киирбит. Руфина бүгүн этэҥҥэ оҕоломмут. Төрүүр дьиэ. Сиэстэрэ оҕону ийэтигэр аҕалар.
Руфина. Сиэстэрэ, төлөпүөммүн аҕала оҕус!
Сиэстэрэ. Мамочка! Мин эйиэхэ оҕоҕун аҕаллым бу!
Руфина. Көрөбүн ээ, харахтаахпын! Оттон айфонум?
Сиэстэрэ. Мэ. (Оҕотун көтөхтөрөр.)
Руфина. Түргэнник аҕала оҕус төлөпүөммүн!
Сиэстэрэ. Алдьархайдаах да ийэлэр, оҕотун көрүмүнэ, төлөпүөнүн көрдүүр. (Баран аҕалар.)
Руфина. Фуу, хайаата эрэ, ибис-инчэҕэй! Сиэстэрэ, көмөлөс, баһаалыста!
Сиэстэрэ. Сатаан суулуугун дуо, оҕоҕун?
Руфина. Наһаа страшнай таҥаһын уһул, итиннэ барыта брендовай таҥастаах пакет баар буолуохтаах, онтон ылан таҥыннар! Оо дьэ, төлөпүөнүм сэрээтэ бүтэн эрэр. Оҕобун устубат буоллум. Чэ, кытаат! Бу палатаҕа мин хотуммун, эн саҥата суох эбээһинэстэргин толорон иһиэхтээххин, өйдөөтүҥ?
Тапталлаах сурутааччыларым! Бүгүн дьэ ийэ буолан, саҥа статустанным. Көрүҥ. (Оҕону видеоҕа устар.) Бухатыыр уолчаан, 3800 ыйааһыннаах, 56 уһуннаах. Барыта этэҥҥэ ааста. Төрүүр диэн кэпсииллэрин курдук наһаа оннук омуннаах ыарыыта суох эбит, онон тулуйуохха син.
Сиэстэрэ. Һы-һы, соторутааҕыта эрэ «киэсэрэптээҥ» диэн хаһыытыы сыппыта. Оҕоҕун эмтэр, Руфина!
Руфина. Суох, суох. Медик буолан баран хайдах билбэккин, оҕо эмтэрэртэн эмиий формата алдьанар. Онон мин оҕом суосканан да аһаатын. Итак наһаа ынырыктык көстөбүн, ужас! Тыҥырах да суох, кожам барыта наһаа ынырык буолбут!
Сиэстэрэ. Саатар, кыратык аһатан көр!
Руфина. Туох ааттаах кэбэ турар сиэстэрэҕиний? Илдьэн аһат! Эн босхо оҥорбоккун ээ, эйиэхэ харчы төлүүллэр! Онон саҥата суох мин туох диирбин оҥорон ис! Өйдөөтүҥ?
Аполлон киирэн кэлэр.
Руфина. Папочкабыт кэллээ!
Аполлон. Ханна баарый, уолум?
Руфина. Бу сытар, кып-кыра бухатыырчаан.
Аполлон. Оо, ким курдуккунуй? Арааһа, мин курдуккун! (Кэргэнигэр эргиллэр.) Бу сирэйиҥ туох ааттаах буолла?
Руфина. Оттон ити барыта балыыһа! Хлор эҥин! Стресс!
Аполлон. Оҥостоор эрэ, үргэнэн хаалбыт кус курдук буолбуккун!
Руфина. Аполлон, мин дьиэбэр барыахпын баҕардым! Манна наһаа тоска.
Аполлон. Билигин саҥа дьиэбитигэр өрөмүөн бүтүө ыраах, онон кэмэ кэллэҕинэ дьиэбитигэр тахсыаххыт.
Руфина. Оо дьэ, туох ааттаах бытаан үлэһиттэри наймыласпыккыный? Уонна мин төрөөбүт күнүм чугаһаата! Бэлэххин толкуйдаатыҥ дуу?
Аполлон. Толкуйдаабытым! Номнуо аҕалан иһэллэр!
Руфина. Кыһыл дьүһүннээх дуо?
Аполлон. Сюрприз! Чэ, көмүстэрим, мин бардым! Дьыала бөҕө күүтэр! (Сыллаан баран тахсан барар.)
Уон биирис көстүү
Эрчиллэр саалаҕа Айдаар умса туттан олорор. Аполлон киирэн кэлэр.
Айдаар. Аполлон, биир көрдөһүүлээхпин. Баһаалыста, харчыта иэһээ эрэ. Бачча тухары син өйөһөн кэллэхпит дии.
Аполлон. Туох буоллуҥ эмиэ, наркотиккар төнүннүҥ дуо?
Айдаар. Суох, ол дьаллыкпын бырахпытым ыраатта. Биир улаханнык ыалдьар кыыска көмөлөһүөхпүн баҕардым. Кореяҕа операциялана барарыгар наада.
Аполлон. Саҥа дьахтарыҥ дуо? Аһымалынан дьарыктанааччылар элбэхтэр, онно барыаххын.
Айдаар. Суох, дьахтарым буолбатах… Көннөрү көмөлөһүөхпүн баҕарабын.
Аполлон. Хас ыалдьар киһиэхэ барытыгар көмөлөстөххүнэ, атах балай бараргар тиийэҕин. Көмөлөһөр харчыта да суох буолан баран туоххунан көмөлөһөөрү гынаҕын?
Айдаар. Мин киһибин – аһынар сүрэхтээх. Хаартыскатын көрүүй, киирэн көрүүй страницатын, хайдахтаах эдэрин. Ким эрэ кэргэнэ, ийэтэ буолуохтаах хаарыан кыыс олоҕо салҕанарыгар көмөлөһүөххэ. Бу олоххо ким даҕаны маннык түгэнтэн сэрэтиллибэт, бары Таҥара илиитигэр сылдьабыт.
Аполлон. Фэйк буолуо.
Айдаар. Фэйк буолбатах, Аполлон. Мин кыаҕым баарынан көмөлөстүм. Кыра да суумма тиийбэт. Эпэрээссийэтин аныгыскы нэдиэлэҕэ болдьообуттар. Онуоха диэри аҕыйах хонук баар.
Аполлон. Айдаар, эйигин киһи кыайан өйдөөбөт киһитэҕин. Арыт мээнэни эрдэҕин, арыт олох даҕаны үтүө сүрэх буола түһэҕин. Өрүү биир сирэйдээх уонна майгылаах буолар баҕайыта. Билигин мин көмөлөстөхпүнэ – хайа, куорат ыарыһаҕа барыта иилистэ түһэр буоллахтара дии. Маннык түгэҥҥэ «Аһымал» акциялар диэн бааллар. Онно тиийэ сырыт уонна Руфинабар массыына ылыам диэн эрэннэрэн кэбиспитим. Төрөөбүт күнэ буолара чугаһаата.
Айдаар. Дьаабы киһи эбиккин, Аполлон! Ама да харчыга хараҥарбытыҥ иһин, киһи олоҕун сыаналаабат буолбуккун. Доҕордоохпун дии санаабытым…
Аполлон. Айдаар, чэ эн олох чугас киһиҥ эбитэ буоллар, мин өйдүөм, кырдьык, көмөлөһүөм этэ. Оттон хаһан да харахтаан көрбөтөх, айах атан кэпсэппэтэх киһибэр, оннооҕор эн билбэт киһигэр хайдах балачча суумманы ууран биэриэхпиний? Харчы сибэкки курдук үүммэт ээ!
Айдаар. Чэ, Аполлон өйдөспөтүбүт. Мин эйигиттэн элбэхтэ көрдөһөөччүм суох. Мин даҕаны эн тиэрэ байаргар син олук уурбут киһи курдук сананабын. Эйиэхэ эрэммитим. (Тахсан барар.)
Аполлон. Ээ дьэ, араас буолан атаахтаан түһэҥҥин, доҕор!
Уон иккис көстүү
Аполлоннаах дьиэлэрэ. Руфина төрөөбүт күнэ. Икки дьүөгэтэ, Аполлон, Байбал бааллар. Руфина төлөпүөнүн биир дьүөгэтигэр биэрэр, дьүөгэтэ камераҕа устар.
Бары ыллыыллар.
С днем рождения, тебя!
С днем рождения, тебя!
С днем рождения, Руфина!
С днем рождения, тебя!
Руфина туорт чүмэчитин үрэр, атыттар ытыстарын таһыналлар.
Аполлон. Тапталлаах Руфинабар баҕа санаатын толорон бу сэмэй бэлэхпин туттарарбын көҥүллээҥ! (Массыына күлүүһүн таһаарар.)
Кыргыттар. Уо-аай!
Байбал. Тыый!
Руфина. Махтал, Аполлон!
Ааны тоҥсуйаллар.
Аполлон. Ким кэллэҕэй?
Руфина. Мин арыйыам, сурутааччыларбыттан презент буолуо, баҕар.
Катя. Тимэппиэйэп Оппуонньа манна олорор дуо?
Руфина. Аадырыскытын сыыспыккыт. Манна итинник диэн киһи суох.
Катя. Мобильная 45, сэттис этээс, сүүрбэ биирис квартира буолбат дуо?
Руфина. Маннык араспаанньалаах киһи суох диэтим дии.
Аполлон. Катя???
Иккилээх оҕону көтөхпүт, биэстээх-алталаах уолу сиэппит, сэттэлээх-аҕыстаах уолу батыһыннарбыт дьахтар киирэн кэлэр.
Катя. Сөпкө кэлбит эбиппит, оҕолор!
Руфина. Туох буола турарын ким эмэ быһаарыҥ эрэ, баһаалыста?
Оҕо «паапаа» диэн сүүрэн кэлэн Аполлон атаҕар иилистэ түһэр. Улахан уол эмиэ чугаһыыр.
Аполлон. Дорообо, Эрчим!
Катя. Биһиги эйигин онно кэтэһэн олоробут, бу кыыспыт аатын Катя диэбитим. Хата буллубут дии. Аны ханна да барбаппыт, бииргэ олоруохпут. Куукуна ханна баарый?
Руфина. Эн кимҥиний уопсайынан? Бу мин дьиэм ээ!
Катя. Мин бу Афанасий Тимофеев сокуоннай ойоҕо – Екатерина Тимофеева диэн буолабын. Хата мин эйигиттэн ыйытыам этэ, эн уопсайынан кимҥиний диэн. Чэ, хомунан баран дьиэлээ! Сөптөөҕүн көрүлээбиккит. Эһиги эмиэ дьиэлээҥ! Бырааһынньык бүттэ! Хата бэрт баҕайы дьиэлэммиппит дуу?
Руфина. Бу мин кэргэним уонна кини аата Аполлон Павлов диэн! Аполлон, тоҕо тугу да саҥарбаккын?
Аполлон. Руфина мин барытын быһаарыам!
Катя. Оҕолоор, туорт сиигит дуо? Уу маннык туортары хаартысканан эрэ көрөр этим, дьэ амсайар буоллаҕым.
Кыргыттар, онтон Байбал уку-сакы тахсан бараллар, Аполлон атаарар.
Байбал. Бэйэҥ прицеп бөҕөлөөх эбиккин дии, братишка. (Саннын таптайан баран тахсар.)
Руфина. Аполлон, тугу эмэ саҥарыый!
Аполлон. Ка-Катя кырдьыгы этэр…
Руфина. Оттон биһиги? Аполлон! Оттон мин, оттон уолбут? Өйдөннө, эн куһаҕан киһи эбиккин. Кэлэйдим. Ол иһин саахсата суох сыбаайбалаабыт эбиппит. Ол иһин барытын кистии сылдьыбыккын. Умнан кэбис миигин! Хаарыан эдэр сааһым сылларын миигиттэн уорбут эн эбиккин. Акаары! Хайдах мин өйдөөн көрбөтөхпүнүй? Миэхэ эйигиттэн туох даҕаны наадата суох! Бэйэбит даҕаны олоруохпут!
Руфина оҕотун оронтон ылан, түбэһиэх таҥыннаран баран көтөҕөн тахсан барар.
Аполлон. Руфина! Тохтоо, ханна бардыҥ? Руфи… Мин эйигин эрэ таптыыбын!
Катя. Бардын, чэ! Таптыыбын, таптыыбын! Таптаа даҕаны хайаа, оҕолору атахтарыгар туруоруохпутун наада билигин. Тапталынан олорор кэм быданнааҕыта ааспыта. Хас лыаҕы сырса сылдьыаххыный, оҕолору санаа. Иитиэхтээхпит – оннук эбээһинэстээхпит!
Аполлон. Катя! Мин бэйэм тиийиэхтээх этим дии, тоҕо тиийэн кэллиҥ?
Катя. Ааккын уларыттара-уларыттара, атын ойохтоно-ойохтоно, өссө тоҕо кэллиҥ диигин дуу? Эн манна барин курдук баайдык олоруохтааххын, биһиги онно оһох отто-отто кэппиэйкэ ааҕыахтаахпыт! Пахай даҕаны! Биһиэхэ оптоволокно тиийэн, Интернет түргэтээн, мин даҕаны ону-маны көрө киирдэҕим дии. Үрэх баһыгар хаалларан баран умнан кэбиһиэм дии санаабытыҥ дуо? Тохтуур инигин. Өссө ыал буола сылдьаҕын. Хата ытыы олоруоҥ дуо, оҕолорго детсад, оскуола булуоҥ этэ. (Хоско киирэр.) Таҥас сууйтарыа этибит, бу таҥас сууйар массыынаҕын кэлэн холбоон биэр эрэ.
Аполлон. Эһиги кэлэ иликкитинэ, бэркэ даҕаны олорбуппут. Акаары даҕаны эбиппин… Тапталбын көрсөн баран, харчыны сырсар инниттэн маннык кэбилэннэхпин… Уһуну-киэҥи толкуйдуурга бириэмэ да тиийбэтэҕэ.
Уон үһүс көстүү
Руфина массыынанан айаннаан иһэн массыыната көлүөһэтин тыына тахсан хаалар. Оҕото ытыыр.
Руфина. Дьиикэй! Ыт! Үөн! Сүөһү! Ынырык куһаҕан төрөөбүт күн! Өссө албыннаабыт буола-буола! Сибиинньэ. Афанасий Тимофеев буола-буола. Ублюдок. (Массыыната умуллан хаалар, уруулун саайар.) Ыт бэлэҕэ бэйэтин курдук, үүт-үкчү. Ыччыы, туох ааттаах тымныытай. Саатар, төлөпүөн хаппат дии. Аата таах сибиэ бараммын. (Чаһытын көрөр.) Бачча хойут ханна мээнэ айаннаабытым буолуой? Акаары! Саатар, оҕобун бу массыынаҕа эрэнэммин халыҥнык да таҥыннарбатахпын (Ытаан барар.) Төрөөбүт күммэр олоҕум маннык түмүктэниэ дии санаабатаҕым. Абаккабыын! Таах сибиэ тахсаммын. Хаһан сибээс быстыбакка хабар буоларый? Саатар, тоҕо биир да массыына суоҕуй? Трассаҕа диэри сатыы барабын дуо? Оҕом таҥаһа чарааһыын. Таҥара, туох иһин маннык ыарахаттары ыытаҕыный? Хайдах буолабыный? (Оҕото ытаан барар.) Чыычаах, ытаамарыый. Аччыктаатаҕыҥ дии. Саатар, кураанах бытыылкаҕын эрэ илдьэ кэлбиппин. Ийэҥ биир да хааппыла үүтэ суох. Хайдах буолабытый, чыычаах? Сарсыардааҥҥа диэри биир да массыына кэлбэтэҕинэ, манна тыыммыт быстар буоллаҕа дии! Көрдөһөбүн, үрдүк күүс! Көмөлөс! Барытын оҥоруом, барытын, көнөтүк олоруом! Баһаалыста! Акаарытык тылласпыппын, куһаҕаннык быһыыламмыппын бары бырастыы гыныҥ! (Массыына тыаһа иһиллэр, хараҕын уутун туора-маары соттор.) Көмөлөһүҥ! Абырааҥ!
Массыынаттан уол тахсан кэлэр.
Виктор. Хайа, туох буоллугут?
Руфина. Баһаалыста, көмөлөһүҥ! Кыра оҕолоохпун. Аччыктаата аҕай!
Виктор. Кэлэн олоруҥ. Термоска итии уу баар. Бачча түүн хайдах кыра оҕолоох бу суолунан айанныыгыный? Манан айаннаабат буолбуттара ыраатта дии.
Руфина. Дьоммор, дойдубар баран испитим.
Виктор. Мин эйигин ханна эрэ көрбүт курдукпун дии.
Руфина. Интернеккэ буолуо.
Виктор. Илэ көрбүт курдукпун.
Руфина. Эн били уу таһааччы уолгун дуо? Хаһан эрэ миигин түҥнэри көппүт.
Виктор. Ээ, оннук баара, кырдьык.
Руфина. Бырастыы гын! Мин эйигин наһаа ынырыктык үөхпүтүм дии!
Виктор. Бадарааҥҥа охтон баран хайгыы сытыаҥ дуо? Мин да сөбүлүөм суох этэ.
Руфина. Бадарааҥҥа охторор диэн муораҕа хааппыла буоллаҕа. Таҥаскын сууннуҥ, куурда, бардыҥ. Олох бадарааныгар охторор дьон эмиэ баар буолаллар эбит. Ол күнтэн ыла күн бүгүнүгэр диэри албын-көлдьүн киһи сымыйатын бадарааныгар сөтүөлээн баран бүгүн саҥа таҕыстым.
Виктор. Лайк бөҕөтүн ылбыт этиҥ дии.
Руфина. Ол лайктар диэн. Киһи олоҕор биир эрэ лайк наада эбит.
Виктор. Ханна айаннаан испиккиний?
Руфина. Мээнэ… кыыһырбытым омунугар. Уһуну толкуйдаабат атаах майгым алдьата сыста. Эн кэлбэтэҕиҥ буоллар, туох буолуо биллибэт.
Виктор. Хайдах эрэ соруйан курдук дии. Мин ол саҕана кэргэммиттэн кыыһыран таһырдьаны былдьаспытым. Били эйигин көтөҕөн массыынаҕа киллэрэн истэхпинэ, ойоҕум балконтан көрөн баран күнүүлээбитэ буолан арахсан хаалбыппыт. Онтон дойдубар көһөн барбытым. Бу бүгүн эмиэ куорат диэки дьоммор баран иһэбин.
Руфина. Ээ. Биһигини ити Ойуунускай уулуссатын үһүс дьиэтигэр түһэрээр дии. Арба, аатыҥ ким диэний?
Виктор. Бииктэр диэн, чэ, кэллибит быһыылаах.
Руфина. Махтал, Виктор!
Руфина массыынаттан тахсан, дьиэҕэ киирэр.
Уон төрдүс көстүү
Түөрт ый ааһан Саҥа дьыл чугаһаабыт. Кыһыҥҥы халыҥ таҥастаах Аполлон биир дьиэ иннигэр төттөрү-таары хаамыталыы сылдьар. Төлөпүөнүн ороон таһааран тугу эрэ суруйар. Оҕотун көтөхпүт Руфина дьиэттэн тахсар.
Аполлон. Руфина, кэлэн иһэр Саҥа дьылынан!
Руфина. Тоҕо кэллиҥ?
Аполлон. Руфина, баһаалыста, иһит миигин! Билинэбин, мин куһаҕан киһибин. Ол гынан баран, саатар, бүтэһик тылбын этэрбин истиий. Кыра эрдэхпиттэн харчыга наһаа харам буолбут эбиппин. Ити ыраах үлэлии тиийэн баран биир кыыһы кытары олорбутум, нэгэйбин билинэбин. Ол кыыһы кэргэн ылан кэбиспитим. Онтон тулаайах хаалбыт икки оҕону иитэ ылбыппыт. Эмиэ харчы наадатыттан. Мин эдэрим бэрт буолан олорон хаалыахпын баҕарбатаҕым уонна харчы өлөрүөм диэн дьоммун хаалларан баран куоракка барбытым. Төлөпүөнүм нүөмэрин, ааппын, оннооҕор араспаанньабын уларыттаран баран саҥа олоҕу саҕалаабытым. Ити кыра кыыстаммыппын даҕаны билбэккэ хаалбыппын. Ол эрэн мин эйигин эрэ таптыыбын. Баҕар, бастаан туох эрэ кэтэх санаа баара буолуо эрээри, билигин оннук буолбатах. Эйигин уонна оҕобун наһаа таптыыбын! Арахсыахпын баҕарбаппын!
Руфина. Дизлайк, Аполлон, дизлайк! Таҥара бырастыы гыныа эйигин, баҕар, лайктыа! Ол гынан баран быраһаай!
Аполлон. Дизлайк эн быраһаайгар! Руфина! Эн биһиги биир улахан лайк аҥаардарабыт.
Руфина. Мин уларыйдым, Аполлон! Мин сылайдым куораттан, ыксалтан, интернеттэн, харчы эккирэтиититтэн, экран иһигэр хааччахтаммыт, дьон биһирэбилин эрэ ылар инниттэн олохтон! Мин ханна эрэ ыраах барыахпын баҕарабын, оҕом улаатарын көрүөхпүн, ийэлээх аҕабын кытары алтыһыахпын, салгыҥҥа сылдьыахпын, бэйэм, бэйэм эрэ бас билэр олохпунан олоруохпун! Бу Саҥа дьылы кытары мин саҥа олоҕу саҕалыыбын.
Аполлон. Иккиэн барыахха! Барытын саҥаттан саҕалыахха!
Руфина. Суох, Аполлон, суох!
Аполлон. Мин бизнеспин атыылаан баран, харчыбын ыалдьар оҕолору эмтиир «Аһымал» фондатыгар биэрдим! Айдаар дьарыктаныа. Мин билигин көҥүл киһибин!
Массыына кэлэн тохтуур.
Руфина. Лайк үтүө дьыалаларгар! Таксим кэллэ, Аполлон, бары үчүгэйи кытары! (Таксист суумкалары ылар.) Хайа, Викторгын дуо?
Виктор. Руфина, дорообо! Тоҕо соһуччутай?
Руфина. Эн таксилыыгын дуо?
Виктор. Ээ дьоммун кытта сатаспакка дойдулаан эрэбин.
Руфина. Мин эмиэ дойдулаатым. Уһуннук, баҕар, олохсуйа хаалыам.
Виктор. Айаммыт сэргэх буолсу!
Аполлон көрөн туран хаалар. Катя Байбаллыын тиийэн кэлэр.
Катя. Бу турар эбиккин дуу! Аппоончи-ик, ээ арба, Аполлончи-ик! Иһит эрэ, манныгы. Бу сыллар тухары сөптөөҕүн түөрт истиэнэҕэ хааллан олордум, билигин мин кэмим кэллэ. Мин дьиҥнээх тапталбын, аналлаахпын көрүстүм! Уонна эн баҕаҕын толорон арахсарга сөбүлэҥмин биэрэбин!
Аполлон. Катя! Байбал, Байбал эн бу Катялыын… Хаһан успейдаан?
Байбал. Олоххо соһуччу араас буолар. Бэйэҥ да бэркэ билэр инигин.
Катя. Байбуусик, бара охсуохха, хойутаары гынныбыт!
Аполлон. Ханна бардыгыт?
Катя. Сөмөлүөккэ! Биһиги итии дойдуларга бардыбыт!
Аполлон. Һа-һа. (Күлэн барар.) Кыл түгэҥҥэ барыта тарбаҕым быыһынан тохтон хаалла. Ойоҕум, сокуоннай ойоҕум, оҕолорум, доҕотторум, үлэм, бизнеһим, аатым-суолум, ыра санаам – барыта… Аны кэлэн олох олорон да диэн. (Ытамньыйар.) Тугу-тугу тыллаһан бардым? Мин мөлтүө суохтаахпын! Хомунуохха, туруохха уонна барыахха! Ханна? Ханна барабын? Ханна миигин ким күүтэр? (Эргиллэн баран үстэ хардыылыыр, тохтуур, төттөрү эргийэр, уҥа диэки хаамар, хаҥас диэки хаамар, эргиллэр.) Дойдубар! Мин дойдубар барыахпын наада! Дьоммор! Дьиэбэр! Ийэбэр! Дойдубар! Салгыы туох буоларын кэм-кэрдии көрдөрүө! Мин дойдулаатым! Лайкынан сыаналанар олоххутугар бэйэҕит хаалыҥ, мин бардым, бардым! (Төлөпүөнүн ыраах быраҕар.)
Быыс