Быйыл Россияҕа Дьиэ кэргэн, Саха сиригэр Оҕо саас сылларын чэрчитинэн Үөһээ Бүлүү улууһугар «Чолбон: өй күрэһэ» улахан өй оонньуута кулун тутар 14 күнүгэр Үөһээ Бүлүүтээҕи О.Д. Федорова аатынан киин модельнай библиотекаҕа ыытыллынна. Күрэххэ улуустан тоҕус ыал кытынна.
Күрэһи «Чолбон» сурунаал бас эрэдээктэрэ Гаврил Андросов, эппиэттиир сэкирэтээр Туяра Павлова уонна сурунаал эрэдээксийэтин сүбэтин чилиэнэ, СӨ суруйааччыларын, Россия суруналыыстарын сойууһун чилиэнэ, поэт, прозаик Ангелина Шадринова-Суоһааны ыыттылар.
5 түһүмэхтээх күрэс түмүгүнэн 1-кы миэстэни Хобусаровтар дьиэ кэргэн (Хоро нэһилиэгэ) ылан , өрөспүүбүлүкэтээҕи түһүмэххэ кыттарга туоһу суругу туттулар. 2-с миэстэ Саввиновтар дьиэ кэргэн (Нам нэһилиэгэ), 3-с миэстэ Чуручановтар дьиэ кэргэн (Үөдүгэй нэһилиэгэ) буоллулар.
Оонньуу кэнниттэн «Чолбон» сурунаал үлэһиттэрин кытта атах тэпсэн олорон кэпсэтии буолла.
Үөһээ Бүлүүтээҕи кииннэммит библиотека ситимэ