Бүгүн, муус устар 11 күнүгэр, Дьокуускайга Бэчээт дьиэтин пресс-киинигэр Россияҕа Дьиэ кэргэн, Саха сиригэр Оҕо саас сылларыгар аналлаах «Чолбон» сурунаал «Чолбон өй күрэһэ» диэн бастыҥ ааҕар дьиэ кэргэни быһаарар, ааҕыыны тарҕатар улахан оонньуутун «Туйгуннар тургутуктара» түһүмэҕэ буолан ааста.
Өрөспүүбүлүкэ 12 улууһугар уонна Дьокуускай куоракка буолбут түһүмэхтэр кыайыылаахтара – барыта тоҕус дьиэ кэргэн кытынна: Кустуровтар (Таатта улууһа), Поповтар (Чурапчы улууһа), Андреевтар (Амма улууһа), Афанасьевтар (Хаҥалас улууһа), Замятиннар (Нам улууһа), Григорьевтар (Бүлүү улууһа), Захаровтар (Мэҥэ-Хаҥалас улууһа), Тарасовтар (Горнай улууһа), Бубякиннар (Дьокуускай куорат).
Түмүккэ 24 очкону ылбыт Захаровтар, 23 очколаах Кустуровтар уонна Бубякиннар кылаан түһүмэххэ кыттар быраабы ыллылар. Түөрт бастыҥ иһигэр киирэр туһугар 22-лии очколаах Тарасовтар уонна Афанасьевтар блиц-ыйытыкка киирсибиттэриттэн Тарасовтар кыайыылаах таҕыстылар. Онон бу түөрт дьиэ кэргэн улуустарын чиэһин сарсын, муус устар 11 күнүгэр, 19:15 чаастан «Саха» көрдөрөр-иһитиннэрэр хампаанньа быһа эфиригэр көмүскүөхтэрэ. Кимнээх кылаан кыайыылах буолалларын, итиэннэ Өлүөнэ очуостарыгар барар путевкаҕа тиксэллэрин сарсын көтүппэккэ көрүҥ.
Кыттааччылары «Сахабэчээт» тэрилтэ салайааччыта Ньургуйаана Михайловна Стручкова эҕэрдэлээтэ
Оонньуу түгэнэ
Бүлүүттэн Григорьевтар. Ольга Самуиловна Каратаева – Николай Нифонтович Каратаев аатынан Тааһаҕар орто оскуолатын саха тылын уонна литературатын учуутала. СӨ үөрэҕириитин туйгуна, Тамара Евгеньевна Куланова – Бүлүү улууһун култуура сайдыытын уонна норуот айымньытын оройуоннааҕы киин информационнай-методическай отдел специалиһа, Олег Григорьев – Тааһаҕар орто оскуолатын 5-с кылааһын үөрэнээччитэ.
Хаҥалас улууһун Улахан Аан бөһүөлэгиттэн Афанасьевтар. Александр Михайлович Афанасьев – үлэ бэтэрээнэ, «Гражданская доблесть» бэлиэ хаhаайына. Варвара Александровна Афанасьева – сылгы иитэр «Бөртө» собуот бухгалтера. Владик Афанасьев – 9-с кылаас үөрэнээччитэ.
Амма улууһун Сатаҕай нэһилиэгиттэн Андреевтар. Анна Ксенофонтовна Андреева – идэтинэн библиотекарь, СӨ культуратын үтүөлээх үлэһитэ. Лия Владимировна – үрдүк категориялаах химия уонна биология учуутала. Андриан – 6-с кылаас үөрэнээччитэ.
Чурапчы улууһуттан Поповтар. Иван Ильич Попов – Саха Республикатын үөрэҕириитин туйгуна, үлэ бэтэрээнэ. Дмитрий Иванович Попов – Нам нэһилиэгэр «Туллукчаан» уһуйаан харабыла. Миша Яковлев – 7-с кылаас үөрэнэнээччитэ.
Нам улууһуттан II Хомустаах нэһилиэгиттэн Замятиннар. Николай Иосифович Замятин – Намлеспромхоз үлэһитэ. Акулина Иосифовна Иванова – Намнааҕы 3-с нүөмэрдээх орто оскуола директора, СР үөрэҕириитин туйгуна, Россия Федерациятын үөрэҕин эйгэтин бочуоттаах үлэһитэ. Каролина – Намнааҕы 1-кы нүөмэрдээх орто оскуола 5-с «б» кылааһын үөрэнээччитэ.
Горнай улууһун Солоҕон нэһилиэгиттэн Тарасовтар. Екатерина Егоровна Тарасова – СӨ үөрэҕириитин туйгуна уонна үтүөлээх уһуйааччыта, Горнай улууһун Солоҕон нэһилиэгин бочуоттаах олохтооҕо. Туйаара Александровна Тарасова – Савва Иванович Тарасов аатынан Өрт орто оскуолатыгар төрөөбүт тылы уонна литератураны үөрэтэр, СӨ үөрэҕириитин туйгуна, учууталлар учууталлара. Сайдам Тарасов – 6-с кылаас үөрэнээччитэ.
Дьокуускайтан Бубякиннар. Надежда Петровна Аргунова – «Забота. Арчы» өрөспүүбүлүкэтээҕи хаһыат политиканы сырдатааччыта. Прокопий Петрович Бубякин – Амма улууһун Эмис нэһилиэгин баһылыга. Сандаара Бубякина – Саха гимназия 4-с «а» кылааһын үөрэнээччитэ.
Таатта улууһуттан Кустуровтар дьиэ кэргэн. Полина Николаевна Кустурова – педагогическай үлэ бэтэрээнэ, идэтинэн омук тылын учуутала, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ. Мандарова Ульяна Дмитрьевна – Таатта улууһун П.А. Ойуунускай аатынан Чөркөөх орто оскуолатын педагог-библиотекара. Венера Ходулова – Чөркөөх орто оскуолатын 10-с кылааһын үөрэнээччитэ.
Мэҥэ Хаҥалас улууhун Нөөрүктээйи нэhилиэгиттэн Захаровтар. Светлана Егоровна Захарова – үөрэҕин бутэриэҕиттэн В.И. Ленин аатынан сопхуоска пенсияҕа тахсыар диэри зоотехнигынан үлэлээбит, үлэ бэтэрээнэ, Нөөрүктээйи нэhилиэгин бочуоттаах олохтооҕо. Наталья Анатольевна Оконешникова – Василий Николаевич Оконешников аатынан Павловскай орто оскуолатын алын кылааһын учуутала. Дайаана – Павловскай орто оскуолатын 8-с кылааhын үөрэнээччитэ.
