2020 сылтан Төрөөбүт тыл уонна сурук-бичик күнүгэр «Чолбон» сурунаал редакцията сыл түмүгүнэн бастыҥ ааптардары бэлиэтиир. Бүгүн, олунньу 13 күнүгэр, үгэс быһыытынан 2024 сыл түмүгүнэн дьоро түһүлгэни тэрийдибит. Бу тэрээһин сүрүн түмэр күүһүнэн Алампа Софронов аатынан «Бастакы эрэдээктэр бириэмийэтэ» буолар. Бу дьоһун ааты туттарыыны 2019 сыллаахха Таатта улууһун Дьохсоҕон нэһилиэгин оччотооҕу баһылыга Петр Егорович Захаров өйөөн, бииргэ туттаран саҕалаабыппыт. Былырыын бу үтүө холобуру батыһан, документалист-суруйааччы Д.Н.Гаврильев дьиэ кэргэнэ аҕаларын, эһэлэрин аатынан кыраайы үөрэтиигэ бириэмийэни олохтообуттара. Быйыл Горнай улууһун дьаһалтата уус-уран тылбааска СӨ норуодунай поэта С.И. Тарасов аатынан бириэмийэ туттарда.
Алампа Софронов аатынан «Бастакы эрэдээктэр бириэмийэтин» быйылгы партнерунан суруйааччы биир дойдулааҕа, Таатта улууһун Дьохсоҕон нэһилиэгиттэн төрүттээх Россия бочуоттаах суолу тутааччыта, СӨ транспорын үтүөлээх үлэһитэ Иван Бочонин салайааччылаах «Тааттаавтодор» акциялаах уопсастыба буолла.
Алампа Софронов аатынан «Бастакы эрэдээктэр бириэмийэтин» лауреаттарынан буоллулар:
— прозаҕа – Саха сирин суруйааччыларын сойууһун Эдэр литератордарын сүбэтин чилиэнэ Наталия Рязанская «Саахар» сэһэнинэн (Амма улууһун Амма сэлиэнньэтэ);
— поэзияҕа – Саха Өрөспүүбүлүкэтин суруйааччыларын сойууһун чилиэнэ Ангелина Шадринова-Суоһааны «Ойуунускай оонньуута» поэматынан, Тыгын Дархаҥҥа уонна Марина Цветаеваҕа анаабыт бөлөҕүн иһин (Дьокуускай куорат);
— «Бастыҥ партнер» — СӨ Национальнай библиотеката (директор С.В. Максимова) «Чолбон өй күрэһэ. Улахан оонньуу» өрөспүүбүлүкэтээҕи бырайыак атаҕар турарыгар улахан көмөтүн иһин.
Бириэмийэни туттарыы сиэригэр-туомугар «Тааттаавтодор» акциялаах уопсастыба генеральнай директорын экономикаҕа солбуйааччы, СӨ бочуоттаах суолу тутааччыта Роман Ефимов кытынна.
Сурунаал партнердара сылын ахсын элбииллэрэ олус үөрдэр.
СӨ Өрөгөй ырыатын тылын айсыбыт СӨ норуотун поэта, Савва Иванович Тарасов аатынан уус-уран тылбааска бириэмийэни төрөөбүт Горнай улууһун аҕа баһылыга Никита Андреев Россия суруйааччыларын сойууһун чилиэнигэр Анатолий Слепцовка Варлам Шаламов «Шерри-бренди» кэпсээнин тылбааһын иһин туттарда.
Документалист-суруйааччы Дмитрий Николаевич Гаврильев аатынан кыраайы үөрэтиигэ бириэмийэ лауреатынан буолла тутулуга суох кыраайы үөрэтээччилэр түмсүүлэрин чилиэнэ, кыраайы үөрэтээччи Станислав Афанасьев «Саха аймах талба түгэнэ уонна Кривошапкин атыыһыт» ыстатыйатын уонна сэдэх былыргы хаартыскаларын иһин.
Ааҕар дьиэ кэргэттэри өйүүр, түмэр «Чолбон өй күрэһэ» оонньууга күүс-көмө буолбут СӨ Национальнай Библиотекатыгар, «САХА» НКИХ салалтатыгар уонна үлэһиттэригэр «Сахабэчээт» СӨ САТ махтал суруктарын генеральнай директор Ньургуйаана Михайловна Стручкова туттарда. Күүс-көмө буолар партнердарбытыгар «Чолбон махталын» бас эрэдээктэр Гаврил Гаврильевич Андросов «Тааттаавтодор» акциялаах уопсастыба генеральнай директорыгар Иван Бочониҥҥа, Горнай улууһун аҕа баһылыгар Никита Викторович Андреевка уонна СӨ адвокаттарын коллегиятын чилиэнигэр Мария Дмитриевна Гаврильеваҕа туттарда.
«Миэхэ Алампаҕа сыһыаннаах барыта сүрэх курдук чугас, күндү, онон бу үүммүт саҥа сылтан Алампа бэйэтэ үөскэппит-төрөппүт «Чолбонуттан» кини бириэмийэтин тутуу миэхэ ол оччонон ордук суолталаах, эппиэтинэстээх буолар…», — диэн Ангелина Шадринова-Суоһааны эттэ.
«Мин Анемподист Иванович Софронов-Алампа бириэмийэтин тутан турарбыттан олус үөрэбин, долгуйан аҕай сылдьабын. Тоҕо диэтэххэ, бу саха литературатын төрүттээбит биир бастыҥ суруйааччыбыт бириэмийэтэ буолар. Онон бу Алампа курдук сүдү киһи, улахан суруйааччы бириэмийэтэ улахан эппиэтинэһи сүктэрэр. Инникитин айарбар-тутарбар миэхэ сүдү күүс буолуо дии саныыбын», — диэн Наталия Рязанская санаатын үллэһиннэ.
«Дмитрий Николаевич Гаврильев дьиэ кэргэнэ олохтообут бириэмийэтэ иккис сылын туттарыллар эбит, онон бу иккис лауреат буоллум. Бэйэм Мэҥэ Хаҥалас Майатыттан төрүттээхпин, кыраайы үөрэтиинэн 2014-2015 сыллартан саҕалаан дьарыктаммытым. Киһи киһиттэн үөрэнэр, бастатан туран, алтыһар доҕотторгуттан. Ол иһин кинилэргэ махтаныам этэ. Итинник эйгэҕэ сырыттахха, киһи билиитэ-көрүүтэ кэҥиир. Кыраайы үөрэтиигэ бириэмийэ анаабыт редколлегияҕа улахан махталбын тиэрдэбин», — диэн Станислав Афанасьев үөрүүтүн үллэһиннэ.
«Бүгүнҥү тэрээһин сүрдээх истиҥ, бэйэм тус санаабар сүрдээх суолталаах буолла. Бу «Чолбон» сурунаал олохтоон тэрийбит бириэмийэтин туттарыы сиэрэ-туома үрдүк таһымҥа ааста уонна кэнэҕэскитин айар дьоҕурдаах дьону көҕулүүр маннык тэрээһиннэр салҕанан бара тураллара буоллар диэн баҕа санаалаахпын. Онно көх буолар, күүс биэрэр дьон кэлэн иһэллэрэ буоллар диэн этиэхпин баҕарабын. Кырдьык, бу сурунаал ыытар үлэтэ сүрдээх кэскиллээх, үлэ күөстүү оргуйарын өрөспүүбүлүкэ олохтоохторо бары даҕаны көрө-билэ сылдьар буолуохтааххыт», — диэн Анатолий Слепцов санаатын эттэ.
Күн — сири, «Чолбон» — саханы сырдатар!